నల్లమల.. అటవీ అందాలు భళా!

ఈనాడు, హైదరాబాద్‌: కాకుల దూరని కారడవి.. ఎటుచూసినా పచ్చదనం.. మధ్యలో కృష్ణమ్మ పరుగులు, పలు రకాల పక్షి జాతులు, వన్యప్రాణులు.. జీవ వైవిధ్యంతో అలరారే నల్లమల అటవీప్రాంతం అద్భుత దృశ్యాలకు నెలవు. వర్షాకాలంలో పచ్చదనం మరింత పరుచుకుని పర్యాటకుల్ని ఆకర్షిస్తుంటుంది. ఈ క్రమంలోనే నల్లమల అటవీ ప్రాంతం వర్షాకాలంలో ఆకుపచ్చ అందాలతో కనువిందు చేస్తోందంటూ రాజ్యసభ సభ్యుడు జోగినపల్లి సంతోష్‌కుమార్‌ ట్వీట్‌ చేశారు. తన కెమెరాలో బంధించిన చిత్రాలను ఆయన తన ట్వీట్‌కు జత చేశారు. అడవుల్లో ఉన్న వృక్షాలు, జంతువుల్ని కాపాడేందుకు అటవీ అధికారులు కృషి చేస్తున్నారంటూ సంతోష్‌ అభినందించారు. నల్లమల వంటి అటవీ రేంజ్‌ తెలంగాణలో ఉన్నందుకు గర్వపడాలి అని ఆయన పేర్కొన్నారు. ఈ విశేషాల్ని అటవీశాఖ శుక్రవారం మీడియాకు విడుదల చేసింది.