చర్చలకు సై అంటూనే ఇరాన్‌ రాకెట్‌ ప్రయోగం

టెహ్రాన్‌: అణు ఒప్పందంపై నిలిచిపోయిన చర్చలు తిరిగి ప్రారంభించాలని ఐరోపా సమాఖ్యతో అంగీకారం కుదిరిన మరుసటి రోజే ఇరాన్‌ ఘన ఇంధన రాకెట్‌ను ప్రయోగించింది. ఈ విషయాన్ని ఆ దేశ జాతీయ టెలివిజన్‌ ప్రకటించింది. దీన్ని ప్రయోగించారా లేదా.. అన్న విషయమింకా నిర్ధారణ కాలేదు. అయితే కొన్ని రోజుల క్రితమే ప్రయోగ సన్నద్ధతకు సంబంధించిన ఉపగ్రహ చిత్రాలు విడుదలయ్యాయి. ఈ కొత్త రాకెట్‌కు 220 కిలోగ్రాముల పేలోడ్‌ తీసుకెళ్లే సామర్థ్యం ఉందని ఇరాన్‌ రక్షణ మంత్రిత్వశాఖ ప్రతినిధి అహ్మద్‌ హుస్సేనీ తెలిపారు. ఇది నిర్ధారిత కక్ష్యలోకి చేరిందా లేదా అన్నదింకా స్పష్టం కాలేదు. రాకెట్‌ ప్రయోగంపై అమెరికా మండిపడింది. ఇది చర్చల కొనసాగింపునకు ఏ రకంగానూ ఉపయోగపడదని, పరిస్థితిని మరింత జఠిలం చేస్తుందని పేర్కొంది. 2018లో ట్రంప్‌ హయాంలో ఇరాన్‌తో అణుఒప్పందం నుంచి అమెరికా తప్పుకుంది. బైడెన్‌ అధికారంలోకి వచ్చిన తర్వాత ఒప్పంద పునరుద్ధరణకు చర్చలు ప్రారంభమయ్యాయి. మధ్యలో ప్రతిష్ఠంభన ఏర్పడింది.