సరబ్‌జీత్‌ సోదరి దల్బీర్‌ కన్నుమూత

అమృత్‌సర్‌: గూఢచర్యం ఆరోపణలతో పాకిస్థాన్‌ జైలులో శిక్ష అనుభవిస్తూ, తోటి ఖైదీల దాడిలో మరణించిన సరబ్‌జీత్‌ సింగ్‌ సోదరి దల్బీర్‌కౌర్‌ (67) ఆదివారం కన్నుమూశారు. తన సోదరుడిని నిర్దోషిగా ప్రకటించాలంటూ ఆమె 22 ఏళ్ల పాటు పోరాటం చేశారు. దల్బీర్‌కౌర్‌ పంజాబ్‌ అమృత్‌సర్‌లో తుదిశ్వాస విడిచారు. ఛాతీలో నొప్పిగా ఉందని శనివారం రాత్రి చెప్పడంతో కుటుంబసభ్యులు ఆమెను అమృత్‌సర్‌ తీసుకొచ్చారు. అక్కడ ఆసుపత్రిలో తుదిశ్వాస విడిచారు.

తన సోదరుడు పొరపాటున సరిహద్దు దాటారని.. ఆయనను విడుదల చేయాలంటూ దల్బీర్‌ 22 ఏళ్ల పాటు న్యాయ పోరాటం చేశారు. సరబ్‌జీత్‌ను చూసేందుకు పాకిస్థాన్‌ సైతం వెళ్లివచ్చారు. సరబ్‌జీత్‌ సింగ్‌, దల్బీర్‌కౌర్‌ జీవితాల ఆధారంగా బాలీవుడ్‌లో బయోపిక్‌ సైతం రూపొందింది. ఈ మేరకు ఐశ్వర్యారాయ్‌ బచ్చన్‌ దల్బీర్‌ పాత్రలో నటించిన ‘సరబ్‌జీత్‌’ చిత్రం 2016లో విడుదలైంది. సరబ్‌జీత్‌ సింగ్‌ భారత్‌, పాకిస్థాన్‌ సరిహద్దులోని భిఖివిండ్‌ గ్రామానికి చెందిన రైతు. 1991లో పొరపాటుగా సరిహద్దును దాటి పాక్‌లోకి ప్రవేశించారు. దీంతో గూఢచర్యం ఆరోపణలతో అరెస్ట్‌ చేసిన పాకిస్థాన్‌.. ఆయనకు మరణశిక్ష విధించింది. అనంతరం లాహోర్‌లోని కోట్‌ లఖ్‌పత్‌ జైలులో శిక్ష అనుభవిస్తుండగా.. 2013లో తోటి ఖైదీలు దాడి చేశారు. తీవ్ర గాయాలపాలైన సరబ్‌జీత్‌ను ఆసుపత్రికి తరలించగా చికిత్స పొందుతూ మరణించారు. అప్పటికి ఆయన వయసు 49 సంవత్సరాలు.