సీపీఎం కార్యాలయంపై బాంబు దాడి

కాంగ్రెస్‌ పనేనన్న అధికార పార్టీ

తిరువనంతపురం: కేరళలోని తిరువనంతపురంలో సీపీఎం రాష్ట్ర ప్రధాన కార్యాలయం ఏకేజీ సెంటర్‌పై గురువారం అర్ధరాత్రి బాంబు దాడి జరగడం కలకలం సృష్టించింది. ద్విచక్రవాహనంపై వచ్చిన ఓ దుండగుడు.. కార్యాలయం ప్రహరీ వైపు పేలుడు పదార్థాన్ని విసిరి పారిపోయాడని పోలీసులు తెలిపారు. ఈ ఘటనలో ఎవరికీ ఎలాంటి హాని కలగలేదని పేర్కొన్నారు. కాంగ్రెస్‌ అగ్రనేత రాహుల్‌ గాంధీ రాష్ట్రంలో పర్యటించనున్న వేళ ఈ ఘటన జరగడం గమనార్హం. ఈ దాడి వెనుక కాంగ్రెస్‌ ఉందంటూ అధికార సీపీఎం తీవ్ర స్థాయిలో ధ్వజమెత్తింది. ఈ ఆరోపణలను కాంగ్రెస్‌ ఖండించింది. పార్టీ కార్యాలయాలపై దాడులు చేయడం తమ పార్టీ విధానం కాదని పేర్కొంది. మరోవైపు ముఖ్యమంత్రి పినరయి విజయన్‌ శుక్రవారం ఏకేజీ సెంటర్‌కు చేరుకుని పరిశీలించారు. ఈ ఘటనకు బాధ్యులను గుర్తించి చర్యలు తీసుకోవాలని పోలీసులను ఆదేశించారు. దాడి నేపథ్యంలో రాష్ట్రవ్యాప్తంగా సీపీఎం, కాంగ్రెస్‌ల కార్యాలయాలకు భద్రత పెంచారు.