గోద్రా నిందితుడు రఫీక్‌ భతూక్‌కు జీవిత ఖైదు

గోద్రా: గుజరాత్‌లోని గోద్రా రైలు దహనం కేసులో కీలక నిందితుడైన రఫీక్‌ భతూక్‌కు న్యాయస్థానం జైవిత ఖైదు విధించింది. ఈ మేరకు గోద్రా అదనపు సెషన్స్‌ న్యాయమూర్తి శనివారం తీర్పు వెలువరించారు. 2021 ఫిబ్రవరిలో రఫీక్‌ అరెస్టు అయ్యాడు. 2002 ఫిబ్రవరి 27న కరసేవకులతో అయోధ్య నుంచి వస్తున్న రైలుకు గోద్రా స్టేషన్‌లో దుండగులు నిప్పుపెట్టారు. ఈ ఘటనలో 59 మంది మృత్యువాతపడ్డారు. ఈ ఘటన జరిగిన అనంతరం గుజరాత్‌లో మత ఘర్షణలు చోటుచేసుకున్నాయి. ఇందులో 1,200 మందికి పైగా మృతి చెందారు. ఈ కేసులో దోషిగా శిక్షపడిన రఫీక్‌ భతూక్‌ 35వ నిందితుడిగా ఉన్నారు. విచారణ పుర్తయిన అనంతరం తాజాగా రఫీక్‌కు అదనపు సెషన్స్‌ న్యాయమూర్తి జీవిత ఖైదు విధిస్తూ తీర్పు చెప్పారు.