మేం రక్షణ కల్పించినా అరెస్టు చేయడమేంటి?

మహారాష్ట్రలో పరిణామంపై సుప్రీం విస్మయం

దిల్లీ: మహారాష్ట్రలో ఓ వ్యక్తికి మధ్యంతర ఉత్తర్వులతో తాము రక్షణ కల్పించినప్పటికీ.. పోలీసులు అరెస్టు చేయడంపై సుప్రీం కోర్టు విస్మయం వ్యక్తం చేసింది. వేరే కేసుల్లో నిందితుడిగా లేకపోతే.. ఆయన్ను తక్షణమే విడుదల చేయాలని సోమవారం ఆదేశించింది. మహారాష్ట్రలోని లాతూర్‌లో ఓ వ్యక్తిపై మోసం సహా పలు అభియోగాలపై కేసు నమోదైంది. ముందస్తు బెయిలు కోసం ఆయన గత ఏడాది సర్వోన్నత న్యాయస్థానాన్ని ఆశ్రయించారు. ఆరు వారాల్లోగా స్పందన దాఖలు చేసేలా ప్రతివాదులకు నోటీసులు జారీ చేయాలని ఆదేశించిన కోర్టు.. ఆ వ్యక్తిని అరెస్టు చేయకుండా మధ్యంతర రక్షణ కల్పిస్తున్నట్లు స్పష్టం చేసింది. అయితే- పోలీసులు నాన్‌ బెయిలబుల్‌ వారెంటు సంపాదించి నిందితుణ్ని అరెస్టు చేశారు. తర్వాత ఆయన్ను జ్యుడీషియల్‌ కస్టడీకి అప్పగించారు. ఈ పరిణామంపై నిందితుడు సుప్రీంకోర్టులో పిటిషన్‌ దాఖలు చేశారు. దానిపై జస్టిస్‌ దినేశ్‌ మహేశ్వరి, జస్టిస్‌ కృష్ణ మురారిలతో కూడిన సెలవుకాల ధర్మాసనం విచారణ జరిపింది. అరెస్టు నుంచి తాము కల్పించిన రక్షణ ఆరు వారాలకే ముగిసినట్లు జ్యుడీషియల్‌ మేజిస్ట్రేట్‌ ఫస్ట్‌క్లాస్‌ ఈ ఏడాది జూన్‌ 24న జారీ చేసిన ఉత్తర్వుల్లో పేర్కొన్నారని గుర్తించి ఆశ్చర్యం, అసంతృప్తి వ్యక్తం చేసింది. మేజిస్ట్రేట్‌ అవగాహన పెంచుకోవాల్సిన ఆవశ్యకతను నొక్కిచెప్పింది. పోలీసులు నాన్‌ బెయిలబుల్‌ వారెంటు పొందడం వారి సత్ప్రవర్తనపై ప్రశ్నలు రేకెత్తిస్తోందనీ వ్యాఖ్యానించింది.