షికాగో కవాతుపై 70 రౌండ్లకు పైగా కాల్పులు

మహిళా వేషధారణలో తప్పించుకున్న దుండగుడు

షికాగో: అమెరికాలో షికాగో శివార్లలోని హైలాండ్‌ పార్క్‌ వద్ద స్వాతంత్య్ర దినోత్సవ కవాతుపై సోమవారం జరిగిన కాల్పులకు సంబంధించి తాజాగా కీలక విషయాలు బయటికొచ్చాయి. పోలీసులు మంగళవారం వెల్లడించిన వివరాల ప్రకారం.. దుండగుడు ఓ ఎత్తయిన వాణిజ్య భవనం పైనుంచి ఏఆర్‌-15 తరహా శక్తిమంతమైన రైఫిల్‌తో 70 రౌండ్లకు పైగా కాల్పులకు తెగబడ్డాడు. అక్కడున్నవారు తూటాల శబ్దాన్ని తొలుత బాణసంచా పేలుళ్లుగా పొరబడ్డారు. తర్వాత అసలు విషయం గ్రహించి ప్రాణాలు అరచేతిలో పెట్టుకొని పరుగులు తీశారు. కాల్పుల అనంతరం దుండగుడు మహిళల తరహా వస్త్రాలు ధరించి.. ప్రాణభయంతో పరుగులు పెడుతున్న జనం మధ్యలో కలిసిపోయాడు. దీంతో అతణ్ని పోలీసులు వెంటనే అరెస్టు చేయలేకపోయారు. ఎట్టకేలకు సోమవారం రాత్రి అతడు చిక్కాడు. కాల్పులకు జాతి, మత వివక్షలే కారణమని చెప్పేందుకు ప్రస్తుతానికి స్పష్టమైన సాక్ష్యాధారాలేవీ లభించలేదు.