Hacking: ఆన్‌లైన్‌ మార్కెట్లో 100 కోట్ల మంది డేటా!

2 లక్షల డాలర్లకు అమ్మజూపుతున్న హ్యాకింగ్‌ వేదిక

హాంకాంగ్‌: చైనాలోని షాంఘై పోలీసుశాఖ సమాచార నిధి (డేటా బేస్‌) నుంచి 100 కోట్ల మంది చైనీయుల వివరాలను తస్కరించామని ‘బ్రీచ్‌ ఫోరమ్స్‌’ అనే ఆన్‌లైన్‌ హ్యాకింగ్‌ వేదిక ప్రకటించింది. ఆసక్తిగలవారికి ఈ 24 టెరాబైట్ల డేటాను 2 లక్షల డాలర్ల (రూ.1.58 కోట్లు) విలువైన 10 బిట్‌కాయిన్ల ధరకు అమ్మజూపింది. గత వారం అపహరించిన ఈ డేటాలో వ్యక్తుల పేర్లు, చిరునామాలు, మొబైల్‌ నంబర్లు, జాతీయ గుర్తింపు సంఖ్యలు, పోలీసు కేసుల వివరాలు ఉన్నాయి. ఈ డేటా నిజమైనదో.. కాదో తెలుపడానికి షాంఘై పోలీసులు నిరాకరించారు. డేటా లీకు గురించి వైబో వంటి చైనీస్‌ సామాజిక మాధ్యమాల్లో జోరుగా చర్చ సాగింది. అధికారులు వెంటనే రంగంలోకి దిగి ఆ సంభాషణలను సెన్సార్‌ చేశారు. డేటా చౌర్యం నిజమే అయితే.. వ్యక్తుల ఆంతరంగిక వివరాలు బరితెగించి మరీ బయటి ప్రపంచానికి చాటింపు వేసినట్లే. చరిత్రలో ఇదే అతిపెద్ద డేటా చౌర్యం అవుతుంది.