రెండో పెళ్లికి మ్యారేజ్‌ బ్యూరో నిరాకరణ.. ఆత్మాహుతికి 64 ఏళ్ల వృద్ధుడి యత్నం!

ఐలాండ్‌: రెండో పెళ్లి కోసం సంబంధం చూసేందుకు ఓ మ్యారేజ్‌ బ్యూరో నిరాకరించిందని దారుణానికి ఒడిగట్టాడో వృద్ధుడు. ఒంటిపై పెట్రోల్‌ పోసుకుని, నిప్పంటించుకున్నాడు. దక్షిణ కొరియాలోని జేజు ఐలాండ్‌లో ఈ ఘటన చోటుచేసుకుంది. జనవరి 16వ తేదీన 64 ఏళ్ల వృద్ధుడు ఓ మ్యారేజ్‌ బ్యూరోకు వచ్చాడు. విదేశీయులతో పెళ్లి సంబంధాలు కుదిర్చే ఆ సంస్థను తనకు సేవలు అందించాల్సిందిగా కోరాడు. తాను వివాహం చేసుకునేందుకు సత్వరమే ఓ అమ్మాయిని చూసిపెట్టాలని అడిగాడు. కానీ.. ఇక్కడే ఆ వృద్ధుడికి, మ్యారేజ్‌ బ్యూరో ప్రతినిధికి మధ్య వాగ్వాదం మొదలైంది. కాసేపటి తర్వాత ఆ వృద్ధుడు పట్టరాని కోపంతో ఊగిపోయాడు. తనతో తెచ్చుకున్న సీసా మూత తెరిచి.. అందులోని పెట్రోల్‌ను ఒంటిపై పోసుకొని నిప్పంటించుకున్నాడు. తీవ్రంగా గాయపడి, అపస్మారక స్థితిలోకి వెళ్లిన ఆ వృద్ధుడిని పోలీసులు ఆసుపత్రిలో చేర్పించారు.