ఎన్‌డీఏలోకి మళ్లీ 19 మంది మహిళలేనా?

కేంద్రం వివరణ కోరిన సుప్రీంకోర్టు

దిల్లీ: జాతీయ డిఫెన్స్‌ అకాడమీ (ఎన్‌డీఏ)లోకి ఈ ఏడాది తీసుకోనున్న మహిళా అభ్యర్థుల సంఖ్యను 19కి పరిమితం చేయనున్నట్లు నోటిఫికేషన్‌లో పేర్కొనడంపై కేంద్ర ప్రభుత్వాన్ని సుప్రీం కోర్టు మంగళవారం ప్రశ్నించింది. వారి సంఖ్య పెంపునకు సంబంధించి తమ ఆదేశాలు స్పష్టంగా ఉన్నప్పటికీ ఎందుకు తక్కువ మందికి ప్రవేశం కల్పిస్తున్నారో మూడు వారాల్లోగా వివరణ ఇవ్వాలని ఆదేశించింది. మహిళా అభ్యర్థుల సంఖ్య గత ఏడాది కూడా 19గానే ఉన్న సంగతిని గుర్తుచేసింది. ‘‘మౌలిక వసతుల సమస్యల కారణంగా మహిళా అభ్యర్థులను తక్కువగా తీసుకుంటున్నట్లు గత ఏడాది మీరు చెప్పారు. ఈ ఏడాదికి కూడా అదే సంఖ్యను ప్రతిపాదించారు. ఎందుకిలా ఖరారు చేశారు? ఎప్పుడూ కేవలం 19 మందినే తీసుకుంటూ ఉండలేం’’ అని కేంద్రాన్ని ఉద్దేశించి జస్టిస్‌ సంజయ్‌ కిషన్‌ కౌల్, జస్టిస్‌ సుందరేశ్‌ల ధర్మాసనం పేర్కొంది. తదుపరి విచారణను మార్చి 6కు వాయిదా వేసింది.