Helicopter: పైలట్లు లేకుండానే హెలికాప్టర్‌ గగనవిహారం

తొలిసారి ఎగిరిన బ్లాక్‌ హాక్‌  

వాషింగ్టన్‌: పైలట్ల అవసరం లేని స్వయంచోదిత హెలికాప్టర్లను సాకారం చేసే దిశగా పెద్ద ముందడుగు పడింది. అమెరికాకు చెందిన బ్లాక్‌ హాక్‌ సైనిక హెలికాప్టర్‌ ఈ విధానంలో తొలిసారి గగనవిహారం చేసింది. ప్రత్యేక సాధనసంపత్తితో కూడిన ఈ లోహవిహంగం.. ఒక సిమ్యులేటెడ్‌ నగరంలో అరగంట పాటు ఎగిరింది.   ఆకాశహర్మ్యాలను తప్పించుకుంటూ ఒడుపుగా ప్రయాణించింది. అనంతరం నిర్దేశిత ప్రదేశంలో భద్రంగా దిగింది. ప్రయాణ సమయంలో ఇది 4వేల అడుగుల ఎత్తుకు చేరింది. గరిష్ఠంగా గంటకు 125 మైళ్ల వేగాన్ని అందుకుంది. ఇటీవల రెండుసార్లు బ్లాక్‌ హాక్‌ను ఈ పద్ధతిలో గగనవిహారం చేయించారు.

ఈ హెలికాప్టర్‌ పూర్తిగా కంప్యూటర్‌ సాయంతో ఎగిరింది. ‘అలియాస్‌’ పేరిట చేపట్టిన రక్షణ పరిశోధన ప్రాజెక్టు కింద అమెరికా దీన్ని అభివృద్ధి చేసింది. పైలట్లు అవసరం లేకుండానే సంక్లిష్ట వాతావరణ పరిస్థితుల్లో రాత్రీపగలు సురక్షితంగా గగనవిహారం చేసేలా దీన్ని తీర్చిదిద్దుతున్నారు.