Luck: ఇటుక బట్టీ నిర్వాహకుడిని వరించిన అదృష్టం

రూ.1.20 కోట్ల విలువైన వజ్రం లభ్యం

పన్నా: నిస్సారమైన వజ్రాల గనిలో చిన్నపాటి ఇటుక బట్టీని నిర్వహిస్తున్న వ్యక్తిని అదృష్టం వరించింది. 26.11 క్యారట్ల విలువైన వజ్రం లభించింది. వేలంలో ఈ వజ్రం రూ.1.20 కోట్ల ధర పలకొచ్చని మధ్యప్రదేశ్‌లోని పన్నా జిల్లాకు చెందిన వజ్రాల అధికారి రవి పటేల్‌ తెలిపారు. పన్నా పట్టణానికి చెందిన సుశీల్‌ శుక్లా, అతని తల్లిదండ్రులు.. కృష్ణ కల్యాణ్‌పుర్‌ ప్రాంతంలోని గనుల్లో సోమవారం ఈ వజ్రాన్ని గుర్తించారని వివరించారు. దీనిని త్వరలో వేలం వేస్తామని,  వచ్చిన మొత్తంలో పన్నులు, రాయల్టీ పోగా మిగిలిన మొత్తం శుక్లాకు అందజేస్తామని చెప్పారు. తమ కుటుంబం 20 ఏళ్లుగా గనుల తవ్వకం పనుల్లో ఉందని, ఇంత విలువైన వజ్రం దొరకడం ఇదే తొలిసారని ఈ సందర్భంగా శుక్లా చెప్పారు.