Omicron: ఒమిక్రాన్‌ తర్వాత.. హెర్డ్‌ ఇమ్యూనిటీ దశ?

వాషింగ్టన్‌: ‘అత్యధికంగా సంక్రమించే గుణం గల వేరియంట్‌ ఏదైనా హెర్డ్‌ ఇమ్యూనిటీకే దారి తీస్తుంది. కరోనా వైరస్‌ విషయంలో దీనిపై అప్పుడే ఓ అంచనాకు రాలేం’ అని మేరిల్యాండ్‌ స్కూల్‌ ఆఫ్‌ పబ్లిక్‌హెల్త్‌ యూనివర్సిటీకి చెందిన డాక్టర్‌ డాన్‌ మిల్టన్‌ తెలిపారు. జనాభాలోని ఓ ప్రాంతానికి చెందిన అందరిలో వైరస్‌ను అడ్డుకొనే రోగనిరోధక శక్తి పెరిగి, వ్యాక్సిను తీసుకోకపోయినా మరో ప్రాంతానికి ఆ వైరస్‌ విస్తరణ జరగకపోతే ఆ దశను హెర్డ్‌ ఇమ్యూనిటీ అంటారు. 

‘క్రమంగా ఆయా ప్రాంతాలు హెర్డ్‌ నిరోధకత దిశగా సాగుతున్నాయి. ఇన్ఫెక్షన్లు ఉంటాయి. కానీ, ప్రజలకు తగినంత రక్షణ ఉంటుంది. భవిష్యత్తులో ఎదురయ్యే వేరియంట్లు సమాజానికి అంత ఇబ్బందికరంగా ఉండవు’ అని మిల్టన్‌ తెలిపారు. కొవిడ్‌-19 రాను రాను ఓ సాధారణ జలుబులా మారి, సీజనల్‌ రుగ్మత మాదిరి పెద్దగా ఇబ్బందులు ఉండవని.. విస్తృత వ్యాప్తి కూడా ఉండదని చాలామంది శాస్త్రవేత్తలు చెబుతున్నదే.