సాఫ్ట్‌వేర్‌ ఇంజినీర్‌ గలీజు దందా!: 200 మంది మహిళలు.. 4వేల నగ్న ఫొటోలు

దిల్లీ: బాలికలు, విదేశీయులు సహా 200 మందికిపైగా మహిళల్ని బెదిరించి, వారి నగ్న చిత్రాలను పోర్న్‌ వెబ్‌సైట్‌లకు విక్రయించిన కీచకుడ్ని దిల్లీ పోలీసులు అరెస్టు చేశారు. అతడి లాప్‌టాప్‌లో ఏకంగా 4వేల నగ్న ఫొటోలు చూసి విస్తుపోయారు. మెకానికల్‌ ఇంజినీరింగ్, ఎంబీఏ చదివి.. ఓ అంతర్జాతీయ దిగ్గజ సంస్థలో ఉద్యోగం చేస్తున్న నిందితుడు మోహిత్‌ శర్మ(33) ఈ అక్రమ దందా సాగిస్తున్న తీరును దిల్లీ పోలీసులు వెల్లడించారు. ఇన్‌స్టాగ్రామ్‌ ద్వారా పరిచయమైన ఓ మహిళ తనను బెదిరించి, నగ్న చిత్రాలు తీసుకుందని 2020 సెప్టెంబర్, 2021 జూన్‌లో దిల్లీ సైబర్‌ సెల్‌ పోలీసులకు ఆన్‌లైన్‌ ద్వారా రెండు ఫిర్యాదులు అందాయి. వాటిపై ఇంటెలిజెన్స్‌ ఫ్యూజన్‌ అండ్‌ స్ట్రాటజిక్‌ ఆపరేషన్స్‌ విభాగం రంగంలోకి దిగింది. ఆ ఇన్‌స్టాగ్రామ్‌ ఐడీని, దానిని సృష్టించేందుకు ఉపయోగించిన ఈ మెయిల్‌ ఐడీని ట్రాక్‌ చేసింది. నొయిడాలోని ఓ ఇంటి నుంచే ఇదంతా జరిగిందని గుర్తించింది. అనంతరం ఏసీపీ రామన్‌ లాంబా, ఇన్‌స్పెక్టర్‌ అరుణ్‌ త్యాగి బృందం ఆ ఇంటికి వెళ్లగా.. మోహిత్‌ శర్మ ఉన్నాడు. ఆ కేసుతో తనకు ఎలాంటి సంబంధం లేదని, తన వైఫై హ్యాక్‌ అయిందని, ఇప్పటికే ఫిర్యాదు కూడా చేశానని తొలుత బుకాయించాడు. అయినా పోలీసుల బృందం అతడి ఫోన్లు, లాప్‌టాప్‌లు అన్నింటినీ పరిశీలించగా అతడి నిర్వాకం బయటపడింది.