Edible oil: వంటనూనెల సలసల.. ఏడాదిలో 20 నుంచి 44% దాకా పెరిగిన ధరలు

దేశీయంగా ఉత్పత్తికి.. డిమాండ్‌కు మధ్య 56% అంతరం ఉందన్న కేంద్రం

ఈనాడు, దిల్లీ: దేశవ్యాప్తంగా వంట నూనెల ధరలు ఏడాది కాలంలో భారీగా పెరిగిపోయాయి. కేంద్ర వినియోగ వ్యవహారాలు, ఆహారం, ప్రజాపంపిణీ వ్యవహారాలశాఖ సహాయమంత్రి సాధ్వీ నిరంజన్‌ జ్యోతి బుధవారం లోక్‌సభకు ఇచ్చిన సమాచారం ప్రకారం ఆరు రకాల వంట నూనెల ధరలు గత ఏడాది కాలంలో కనిష్ఠంగా 20% నుంచి 44%దాకా పెరిగాయి. దేశీయంగా ఉత్పత్తి అవుతున్న వంట నూనెలకు, డిమాండ్‌కు మధ్య దాదాపు 56% అంతరం ఉంటోందని, ఆ అగాధాన్ని దిగుమతుల ద్వారా పూడ్చుకోవాల్సి వస్తోందని ఆమె తెలిపారు. అంతర్జాతీయంగా నూనెల ధరలు పెరగడం వల్ల ఆ ప్రభావం దేశీయ ధరలపైనా కనిపిస్తున్నట్లు వెల్లడించారు. 2018-19లో దేశీయంగా 103.52 లక్షల మెట్రిక్‌ టన్నులు, 2019-20లో 106.55 లక్షల మెట్రిక్‌ టన్నులు, 2020-21లో 111.51 లక్షల మెట్రిక్‌ టన్నుల నూనె ఉత్పత్తి అయినట్లు చెప్పారు. ఇదే సమయంలో వరుసగా 155.7, 134.16, 134.52 లక్షల మెట్రిక్‌ టన్నుల మేర దిగుమతి చేసుకున్నట్లు కేంద్రమంత్రి వెల్లడించారు. వినియోగదారులకు సబ్సిడీ ధరల్లో వంట నూనెలను పంపిణీ చేసే ప్రతిపాదనేదీ కేంద్రం వద్ద లేదని వెల్లడించారు.