భర్త పింఛను కోసం 56 ఏళ్ల న్యాయపోరాటం.. ఎట్టకేలకు విజయం

యుద్ధంలో అమరుడైన భర్త పింఛను కోసం 56 ఏళ్లు పోరాడిన మహిళ ఎట్టకేలకు విజయం సాధించింది. బాధితురాలికి 6 శాతం వడ్డీతో మొత్తం పెన్షను చెల్లించాలని చండీగఢ్‌ హైకోర్టు తీర్పునిచ్చింది. 1962 ఇండియా - చైనా యుద్ధంలో ప్రతాప్‌సింగ్‌ అనే సీఆర్పీఎఫ్‌ జవాను వీరమరణం పొందారు. తరవాత ప్రభుత్వం పింఛను ఆయన భార్య ధర్మోదేవికి ఇచ్చేది. ఉన్నట్టుండి 1966 నుంచి పెన్షను ఆగిపోయింది. బాధితురాలు చండీగఢ్‌ హైకోర్టును ఆశ్రయించి, 56 ఏళ్ల సుదీర్ఘ న్యాయపోరాటం చేసింది. జస్టిస్‌ హర్సిమాన్‌సింగ్‌ సేఠీ ధర్మాసనం ఇటీవల ఈ కేసును విచారించగా.. పింఛను ఆపేయడం తమ ఉద్దేశం కాదని.. సమాచారంలోపం వల్లే ఇలా జరిగిందని కేంద్రం, సీఆర్ఫీఎఫ్‌ హైకోర్టుకు తెలిపాయి. 56 ఏళ్లుగా చట్టబద్ధమైన హక్కులను బాధితురాలు కోల్పోయిందని.. అప్పటి నుంచి రావాల్సిన అన్ని అలవెన్సులు పొందేందుకు ఆమె అర్హురాలని బాధితురాలి తరఫు న్యాయవాది  వాదించారు. విచారణ అనంతరం.. ఆమెకు భత్యాలతోపాటు పింఛను పునరుద్ధరించాలని హైకోర్టు కేంద్రానికి ఆదేశాలు జారీ చేసింది.