Covid Deaths: కరోనా మరణాల లెక్కింపు ఇలాగేనా?

డబ్ల్యూహెచ్‌వో పద్ధతిని ప్రశ్నించిన కేంద్రం

దిల్లీ: దేశంలో కరోనా కారణంగా మృతి చెందినవారి సంఖ్యను లెక్కించడానికి ‘ప్రపంచ ఆరోగ్య సంస్థ’ (డబ్ల్యూహెచ్‌వో) అనుసరించిన విధానాన్ని కేంద్ర ఆరోగ్య మంత్రిత్వశాఖ ప్రశ్నించింది. జనాభాలో, విస్తీర్ణంలో ఇంత పెద్ద దేశానికి ఒక గణిత నమూనాను వర్తింపజేయడంలో ఔచిత్యాన్ని తప్పుపట్టింది. ప్రపంచవ్యాప్త కొవిడ్‌ మరణాలను బహిర్గతం చేయాలన్న డబ్ల్యూహెచ్‌వో ప్రయత్నాలకు భారత్‌ అడ్డుపడుతోందని శనివారం ‘న్యూయార్క్‌ టైమ్స్‌’లో ప్రచురితమైన కథనాన్ని కేంద్రం ఖండించింది. మృతుల సంఖ్య లెక్కింపునకు పాటిస్తున్న పద్ధతిపై గతంలోనూ పలుమార్లు ఆందోళన వ్యక్తం చేసిన విషయాన్ని గుర్తుచేసింది. కొన్ని దేశాలకు అనుసరిస్తున్న విధానాన్ని భారత్‌కూ వర్తింపజేయడం తగదని పేర్కొంది. తమ అభ్యంతరం.. ఫలితాల గురించి కాదనీ, దానికి అనుసరిస్తున్న విధానాన్నే తప్పు పడుతున్నామని తెలిపింది.