Crime News: పుట్టినరోజు వేడుకకు పిలిచి ప్రేయసికి నిప్పు

పాలక్కాడ్‌: తన పుట్టినరోజు వేడుకలు ఉన్నాయంటూ ఇంటికి పిలిచి 16 ఏళ్ల బాలికకు నిప్పంటించాడు ఓ యువకుడు. ఆ తర్వాత తానూ నిప్పుపెట్టుకున్నాడు. తీవ్ర గాయాలతో ఆసుపత్రిలో చికిత్స పొందుతూ ఇరువురు ప్రాణాలు కోల్పోయారు. కేరళలోని పాలక్కాడ్‌ జిల్లాలో ఆదివారం ఉదయం ఈ ఘటన చోటుచేసుకుంది. కొల్లెంగోడ్‌ గ్రామానికి చెందిన బాలసుబ్రమణియం(23) తన పుట్టినరోజు ఉందంటూ ఆ బాలికను ఇంటికి పిలిచాడు. ఉదయం 7 గంటలకు ఇంటికి వెళ్లిన ఆమెను గదిలోకి తీసుకెళ్లి నిప్పంటించాడు. ఆ తర్వాత తానూ అంటించుకున్నాడు. ఆ సమయంలో ఇంట్లో బాలసుబ్రమణియం తల్లి, తమ్ముడు మాత్రమే ఉన్నారు. తీవ్ర గాయాలైన ఇరువురిని స్థానికుల సాయంతో తొలుత త్రిశూర్‌ వైద్య కళాశాలకు తరలించారు. ఆ తర్వాత మెరుగైన వైద్యం కోసం ఎర్నాకులంలోని ఓ ప్రైవేటు ఆసుపత్రికి తీసుకెళ్లారు. అక్కడ చికిత్స పొందుతూ మధ్యాహ్నం మృతి చెందారు. యువకుడు, యువతి  ప్రేమించుకుంటున్నట్లు తెలిసింది. వారి ప్రేమను రెండు కుటుంబాలు నిరాకరించాయి. ఈ కారణంతోనే బాలసుబ్రమణియం బాలికకు నిప్పుపెట్టి ఆ తర్వాత ఆత్మహత్యకు పాల్పడి ఉంటాడని స్థానికులు చెబుతున్నారు.