Corona: ‘దక్షిణ’ బెలూన్లే కరోనాను మోసుకొచ్చాయి

ఉత్తర కొరియా వింత వాదన

సియోల్‌: ఉత్తర కొరియాలో కొవిడ్‌ ప్రబలడం వెనుక.. ఆ దేశం ఓ వింతైన కారణాన్ని తెరపైకి తెచ్చింది. పొరుగున ఉన్న దక్షిణ కొరియాను నిందించే ప్రయత్నం చేసింది. ఆ దేశం నుంచి గాల్లో ఎగురుకుంటూ వచ్చిన బెలూన్ల వల్లే తమ దేశంలో కొవిడ్‌ వ్యాప్తి ప్రారంభమై ఉండొచ్చన్న అభిప్రాయాన్ని శుక్రవారం వ్యక్తం చేసింది. ఉభయ దేశాల మధ్య ఉద్రిక్తతలు కొనసాగుతున్న వేళ.. ఈ వాదన వివాదాస్పదంగా మారింది. అయితే ద.కొరియా దీన్ని తోసిపుచ్చింది. ఏళ్ల తరబడి పలువురు కార్యకర్తలు ఉ.కొరియా అధినేత కిమ్‌ జోంగ్‌ ఉన్‌ను విమర్శిస్తూ సరిహద్దు వెంబడి కరపత్రాలు వంటివాటితో కూడిన బెలూన్లను వదులుతుంటారు. దీనిపై  ఉత్తర కొరియా ఆగ్రహం వ్యక్తం చేస్తూ వస్తోంది.