నగలు వద్దన్న వధువు..7 పేద కుటుంబాలకు వెలుగు

పెళ్లంటే.. ఏ వధువైనా ఖరీదైన దుస్తులు, నగలు ధరించి జరుపుకుంటుంది. కానీ కేరళకు చెందిన షెహ్నా షెరి అనే యువతి మాత్రం స్తోమత ఉన్నప్పటికీ నగలు లేకుండానే వివాహం చేసుకుంది. అందుకయ్యే ఖర్చును 7 పేద కుటుంబాలకు సాయంగా పంచింది. కోజికోడ్‌ జిల్లా మయపయ్యూర్‌కు చెందిన అంత్రు-రంలా దంపతుల కుమార్తె షెహ్నా షెరికి.. కొట్టపల్లికి చెందిన మహమ్మద్‌ షఫీతో పెళ్లి నిశ్చయమైంది. షెహ్నా తన వివాహాన్ని సాధారణంగా జరుపుకుని మిగిలే డబ్బుతో పేదలకు సహాయం చేయాలనుకుంది. ఆమె నిర్ణయాన్ని తల్లిదండ్రులు, వరుడు అంగీకరించడంతో పెళ్లితంతును నిరాడంబరంగా ముగించారు. పెళ్లి వేదికపైనే 21 సెంట్ల భూమిని నాలుగు నిరుపేద కుటుంబాలకు పంపిణీ చేశారు. ఓ పేద వ్యక్తికి ఇంటిని నిర్మించి ఇచ్చారు. మరొకరి ఆస్పత్రి చికిత్సకు డబ్బు అందించారు. ఓ పేద అమ్మాయి వివాహ ఖర్చును భరించారు. దగ్గర్లోని డయాలసిస్‌ సెంటర్‌కు కూడా విరాళం ఇచ్చారు. ఇలా తమ సంతోషాన్ని నలుగురికీ పంచి ప్రశంసలందుకున్నారు.