జ్ఞాపకశక్తితో ఔరా ఈ పిల్ల.. అసాధ్యురాలు

తిరువనంతపురం: కేరళలోని కాసరగోడ్‌కు చెందిన రెండున్నరేళ్ల చిన్నారి బాల పార్వతి తన జ్ఞాపకశక్తితో ఔరా అనిపిస్తోంది. మంత్రుల పేర్లను చకచకా చెప్పేస్తోంది. అంతేకాదు.. స్వాతంత్య్ర సమరయోధులు, పలు దేశాల జెండాల ఫొటోలను తన ముందు పెడితే ఇట్టే గుర్తుపడుతోంది. ఈ అసాధారణ ప్రతిభతోనే ఇండియా బుక్‌ ఆఫ్‌ రికార్డ్స్‌లోనూ చోటు దక్కించుకుంది. కాసరగోడ్‌కు చెందిన హరీశ్, సుకన్య దంపతుల ఏకైక కుమార్తె బాల పార్వతి. ఏడాది వయసులోనే తన కుమార్తెలో ప్రత్యేక ప్రతిభను వారు గుర్తించారు. జనరల్‌ నాలెడ్జ్‌ సహా పలు అంశాలపై అవగాహన కల్పించారు. ఈ క్రమంలోనే నేపథ్య సంగీతం విని.. ఆ పాటలను పసిగట్టే నైపుణ్యాన్ని పార్వతి సొంతం చేసుకుంది. మలయాళం, తమిళం, తెలుగు భాషల్లో పాటలను పాడేస్తోంది.