Wimbledon 2022: స్టార్‌ ఆటగాడికి కరోనా పాజిటివ్‌.. టోర్నీ నుంచి ఔట్‌..

ఇంటర్నెట్ డెస్క్: గతేడాది వింబుల్డన్‌ టోర్నీ రన్నరప్‌గా నిలిచి ఈ సారి టైటిల్‌ ఫేవరెట్లలో ఒకడిగా ఉన్న ఇటాలియన్‌ టెన్నిస్‌ స్టార్‌ మాటియో బెరెట్టిని ఒక్క మ్యాచ్‌ ఆడకుండానే టోర్నీ నుంచి నిష్క్రమించాడు. అతడికి కరోనా పాజిటివ్‌గా తేలడంతో వింబుల్డన్ 2022 నుంచి వైదొలిగాడు. ఈ విషయాన్ని స్వయంగా మాటియో బెరెట్టిని ఇన్‌స్టాగ్రామ్ ద్వారా వెల్లడించాడు. ‘నాకు కొవిడ్‌ లక్షణాలు ఉన్నాయి.గత కొన్ని రోజుల నుంచి ఐసోలేషన్‌లో ఉంటున్నా. లక్షణాలు తీవ్రంగా లేనప్పటికీ నా తోటి ఆటగాళ్లు, టోర్నమెంట్‌లో పాల్గొనే ప్రతి ఒక్కరి ఆరోగ్యం, భద్రతను దృష్టిలో ఉంచుకుని ఈ రోజు ఉదయం మరొకసారి కొవిడ్‌ నిర్ధారణ పరీక్ష చేయించుకున్నా. దాంట్లో నాకు పాజిటివ్‌గా తేలింది. అందుకే నేను వింబుల్డన్ నుంచి వైదొలుగుతున్నా. టోర్నీ వైదొలగడం పట్ల తీవ్ర నిరుత్సాహానికి గురవుతున్నా. దానిని వర్ణించడానికి నా దగ్గర మాటలు లేవు. ఈ ఏడాది నా కల చెదిరింది. వచ్చే మరింత బలంగా ముందుకు వస్తా’ అని బెరెట్టిని ఇన్‌స్టాగ్రామ్‌లో పోస్ట్ చేశాడు.మాటియో బెరెట్టిని 2021 వింబుల్డన్‌ ఫైనల్‌లో సెర్బియా స్టార్‌ నొవాక్‌ జకోవిచ్‌ చేతిలో బెరెట్టిని పరాజయం పాలయ్యాడు.