కారు ఢీకొని.. యువ క్రికెటర్‌ దుర్మరణం

ఇంటర్నెట్‌ డెస్క్‌: రోడ్డు ప్రమాదంలో ఓ అంతర్జాతీయ క్రికెటర్‌ ప్రాణాలు కోల్పోయాడు. అఫ్ఘానిస్థాన్‌ ఓపెనర్‌ బ్యాట్స్‌మన్‌ నజీబ్‌(29) రోడ్డు ప్రమాదానికి గురయ్యాడు. గత శుక్రవారం నజీబ్‌ మార్కెట్‌కు వెళ్లి వస్తుండగా రోడ్డు దాటుతున్న క్రమంలో ఓ ప్యాసింజర్‌ కారు ఢీకొట్టింది. ఈ ప్రమాదంలో తీవ్రంగా గాయపడ్డ క్రికెటర్‌ను ఆసుపత్రికి తీసుకెళ్లారు. ఆసుపత్రిలో చికిత్స పొందుతూ పరిస్థితి విషమించడంతో మంగళవారం ప్రాణాలు కోల్పోయాడు. ‘ఓ డ్యాషింగ్‌ ఓపెనర్‌తో పాటు మంచి మనిషిని కోల్పోయామన్న వార్త మమ్మల్ని షాక్‌కు గురి చేసింది’ అని ఆ దేశ‌ క్రికెట్‌ బోర్డు ట్వీట్‌ చేసింది.
నజీబ్‌ 2014లో జింబాబ్వేపై తొలి ఫస్ట్‌క్లాస్‌ క్రికెట్‌ మ్యాచ్‌ ఆడాడు. 24 మ్యాచుల్లో 47.2 సగటుతో పరుగులు చేశాడు. గతేడాది ఏప్రిల్‌లో అతను ఓ డబుల్‌ సెంచరీ సాధించాడు. అఫ్గానిస్థాన్‌ తరఫున 12 టీ20లు, ఒక వన్డేకు ప్రాతినిథ్యం వహించాడు. 2017లో ఐర్లాండ్‌తో జరిగిన ఓ టీ20 మ్యాచ్‌లో నజీబ్‌ 90 పరుగులతో ఓ మెరుపు ఇన్నింగ్స్‌ కూడా ఆడాడు.