బాక్సింగ్‌డే టెస్టులో ప్రతిష్ఠాత్మక పతకం..

మెల్‌బోర్న్‌: డిసెంబర్‌ 26 నుంచి మెల్‌బోర్న్‌ వేదికగా జరిగే బాక్సింగ్‌డే టెస్టులో ‘ప్లేయర్‌ ఆఫ్‌ ది మ్యాచ్‌’గా ఎంపికైన ఆటగాడికి ప్రతిష్ఠాత్మక ‘జానీ ముల్లఘ్‌ పతకాన్ని’ బహుకరిస్తామని క్రికెట్‌ ఆస్ట్రేలియా(సీఏ) ప్రకటించింది. సోమవారం ట్వీట్‌ చేస్తూ ఈ విషయాన్ని వెల్లడించింది. 1868లో ఆస్ట్రేలియా తొలి అంతర్జాతీయ పర్యటన సందర్భంగా ఇంగ్లాండ్‌కు వెళ్లిన ఆ జట్టుకు ముల్లఘ్‌ కెప్టెన్‌గా వ్యవహరించారు. ఆ పర్యటనలో ఆయన 45 మ్యాచ్‌లు ఆడగా 20 సగటుతో 1,698 పరుగులు చేశాడు. ఇక బౌలింగ్‌ విభాగంలో 1,877 ఓవర్లకు గాను 831 ఓవర్లు మెయిడిన్లు చేశాడు. 245 వికెట్లు పడగొట్టాడు. అతడి సేవలను గుర్తు చేసుకుంటూ భారత్‌-ఆస్ట్రేలియా మధ్య జరిగే రెండో టెస్టులో ‘ప్లేయర్‌ ఆఫ్‌ ది మ్యాచ్‌’ను ఈ విధంగా సన్మానిస్తున్నట్లు సీఏ వివరించింది. 

ఇక అడిలైడ్‌లో జరిగిన తొలి టెస్టులో ఆస్ట్రేలియా ఘన విజయం సాధించిన సంగతి తెలిసిందే. తొలి ఇన్నింగ్స్‌లో ఆ జట్టు 53 పరుగుల తేడాతో వెనుకపడిపోయినా రెండో ఇన్నింగ్స్‌లో అనూహ్యంగా పుంజుకుంది. ముఖ్యంగా జోష్‌ హాజిల్‌వుడ్‌ 5/8, పాట్‌ కమిన్స్‌ 4/21 అద్భుతంగా బౌలింగ్‌ చేయడంతో భారత్‌ 36/9కే పరిమితమై తన టెస్టు చరిత్రలో అత్యంత ఘోరమైన రికార్డు నెలకొల్పింది. చివరికి ఆస్ట్రేలియా రెండు వికెట్లు కోల్పోయి 90 పరుగుల లక్ష్యాన్ని పూర్తి చేసింది. ఈ మ్యాచ్‌లో ఆసీస్‌ కెప్టెన్‌ టిమ్‌పైన్‌ ప్లేయర్‌ ఆఫ్‌ ది మ్యాచ్‌గా ఎంపికయ్యాడు. మరి రెండో టెస్టులో ఈ ఘనత సాధించి ఆ ప్రతిష్ఠాత్మక పతకం ఎవరు సాధిస్తారో వేచి చూడాలి.

ఇవీ చదవండి..

కిం కర్తవ్యం..!

తొలి ఆస్ట్రేలియా పర్యటన చాలా నేర్పింది