గౌతమ్‌ గంభీర్‌కు కరోనా నెగెటివ్

ఇంటర్నెట్‌డెస్క్‌: కరోనా పరీక్షల్లో తనకు నెగెటివ్‌గా తేలిందని టీమ్‌ఇండియా మాజీ క్రికెటర్‌, భాజపా ఎంపీ గౌతమ్‌ గంభీర్ తెలిపారు. ఆదివారం ఓ ట్వీట్‌ చేసి ఈ విషయాన్ని వెల్లడించారు. ఇటీవల గంభీర్‌ ఇంట్లో ఒకరు కరోనా బారిన పడిన సంగతి తెలిసిందే. దీంతో ఆయన స్వీయ నిర్బంధంలో ఉండి ఆ విషయాన్ని తన అభిమానులకు తెలియజేశారు. ఈ క్రమంలోనే తాను కూడా పరీక్షలు చేయించుకున్నానని.. ఇప్పుడు నెగెటివ్‌గా వచ్చిందని తాజాగా పేర్కొన్నారు. అలాగే తన ఆరోగ్యం కోసం ప్రార్థించిన వారందరికీ ధన్యవాదాలు చెప్పారు. ఈ సందర్భంగా ప్రతీ ఒక్కరూ కరోనా నిబంధనలను కచ్చితంగా పాటించాలని భాజపా ఎంపీ మరోసారి ప్రజలను కోరారు.