ఇంటర్నెట్‌డెస్క్‌: చూస్తుండగానే 2020 ముగిసింది. కరోనా నేపథ్యంలో టీమ్‌ఇండియా ఈ ఏడాది పరిమిత సంఖ్యలోనే మ్యాచ్‌లాడింది. అయితే, భారత ఆటగాళ్లలో ఈ సంవత్సరం అందరి కన్నా ఎక్కువ ఆర్జించింది మాత్రం పేసర్‌ జస్ప్రీత్‌ బుమ్రా. కెప్టెన్‌ విరాట్‌ కోహ్లీ కన్నా ఎక్కువ పారితోషికం సంపాదించాడు.

బీసీసీఐ వార్షిక కాంట్రాక్ట్‌లో కోహ్లీ, బుమ్రా, రోహిత్‌ శర్మ.. A+ కేటగిరీలో ఉన్నారు. ఈ ముగ్గురూ ఏడాదికి రూ.7 కోట్ల చొప్పున అందుకుంటారు. ఇది కాకుండా బీసీసీఐ ఆటగాళ్లకు మ్యాచ్‌ ఫీజులు కూడా చెల్లిస్తుంది. ఒక్క టెస్టు మ్యాచ్‌కు రూ.15 లక్షలు, వన్డేకు రూ.6 లక్షలు, టీ20లకు 3లక్షల చొప్పున పారితోషికం అందజేస్తుంది. ఈ నేపథ్యంలో బుమ్రా 2020లో అందరికన్నా ఎక్కువ మ్యాచ్‌లు ఆడి ఎక్కువ ఆదాయం పొందాడు. మొత్తం 4 టెస్టులు, 9 వన్డేలు, 8 టీ20లు ఆడిన టీమ్‌ఇండియా పేసర్‌ ఈ ఏడాది మ్యాచ్‌ ఫీజుల రూపంలో రూ.1.38 కోట్లు తన ఖాతాలో వేసుకోనున్నాడు.

కోహ్లీ ప్రస్తుతం ఆస్ట్రేలియాతో జరుగుతున్న రెండో టెస్టు ఆడలేకపోవడంతో రూ.1.29 కోట్లు అందుకోనున్నాడు. ఒకవేళ ఈ మ్యాచ్‌ కూడా ఆడి ఉంటే టీమ్‌ఇండియా సారథి మొత్తం రూ.1.44 కోట్లు అందుకొని అగ్రస్థానంలో నిలిచేవాడు. మరోవైపు A కేటగిరీలో ఉన్న ఆల్‌రౌండర్‌ రవీంద్ర జడేజా ఈ ఏడాది మ్యాచ్‌ ఫీజుల రూపంలో తీసుకునేది రూ.96 లక్షలు. బుమ్రా, కోహ్లీ తర్వాత ఇతడే మూడో స్థానంలో నిలిచాడు. ఇక ఓపెనర్‌ రోహిత్‌ శర్మ ఈ ఏడాది గాయాల కారణంగా ఎక్కవ మ్యాచ్‌లు ఆడలేకపోయాడు. దీంతో అతడి ఆదాయం రూ.30లక్షలకే పరిమితమైంది.  

ఇవీ చదవండి..

ఇదేం అంపైరింగ్‌? బాక్సింగ్ డే టెస్టుపై రచ్చ

జింక్స్‌ అదరహో: సెహ్వాగ్‌