ధోనీ యాక్షన్‌.. అంపైర్‌ రియాక్షన్

దుబాయ్‌: యూఏఈలో జరుగుతున్న టీ20 లీగ్‌లో మంగళవారం చెన్నై, హైదరాబాద్‌ జట్లు తలపడ్డాయి. చెన్నై నిర్దేశించిన లక్ష్యాన్ని హైదరాబాద్‌ జట్టు ఛేదించలేకపోయిన విషయం తెలిసిందే. అయితే ఈ మ్యాచ్‌లో హైదరాబాద్‌ జట్టు బ్యాటింగ్‌ చేస్తున్న సమయంలో చోటు చేసుకున్న ఓ సంఘటన సామాజిక మాధ్యమాల్లో ట్రోల్‌ అవుతోంది. 

19వ ఓవర్లో రషీద్‌ఖాన్‌ బ్యాటింగ్‌ చేయగా శార్దూల్‌ఠాకూర్‌ బౌలింగ్‌ వేశాడు. ఆ సమయంలో హైదరాబాద్‌కు 11 బంతుల్లో 25 పరుగులు కావాల్సి ఉంది. ఆ ఓవర్లో శార్దూల్‌ వేసిన యార్కర్‌ బంతిని అంపైర్ రెయిఫెల్.. వైడ్‌గా ప్రకటించబోయారు. దాన్ని గమనించిన చెన్నై సారథి ధోనీ ఆ నిర్ణయాన్ని విభేదిస్తూ ముందుకొచ్చాడు. దీంతో అంపైర్‌ తన నిర్ణయాన్ని ఉపసంహరించుకున్నారు. అంపైర్‌ చర్యపై ఆ సమయంలో వార్నర్‌ అసహనం వ్యక్తం చేశాడు. ధోనీ వ్యవహరించిన తీరుపై సామాజిక మాధ్యమాల్లో నెటిజన్లు ట్రోల్ చేస్తున్నారు. చెన్నై సారథి అంపైర్‌ను బెదిరించి గెలిచాడని కొందరు.. మిస్టర్‌ కూల్‌ కూల్‌నెస్‌ను కోల్పోయాడని ఇంకొందరు ట్వీట్లు చేస్తున్నారు.