ధోనీ.. ఓ సైనికుడిలా సేవచేశాడు: ఎమ్మెస్కే

హైదరాబాద్‌: టీమ్‌ ఇండియా మాజీ సారథి ఎంఎస్‌ ధోనీ అంతర్జాతీయ క్రికెట్‌కు వీడ్కోలు పలకడంపై బీసీసీఐ మాజీ చీఫ్‌ సెలక్టర్‌ ఎంఎస్‌కే ప్రసాద్‌ స్పందించారు. ధోనీ సుదీర్ఘ కాలంగా క్రికెట్‌ రంగానికి ఎంతో సేవలందించారని ప్రశంసించారు. భారత క్రికెట్‌ చరిత్రలో విజయవంతమైన కెప్టెన్‌గా నిలిచాడని ‘ఈటీవీ’తో ఫోన్‌లో తెలిపారు.  మూడు ఐసీసీ ట్రోఫీలిచ్చాడనీ.. ఎన్నో ఐపీఎల్‌లు గెలిచాడని గుర్తు చేసుకున్నారు. ఒక గొప్ప ఆటగాడు ఈ రోజు రిటైర్మెంట్‌ ప్రకటించడం అందరికీ బాధాకరమైన విషయమేనని తెలిపారు.

భారత క్రికెట్‌ జట్టు గెలుపు కోసం ఒక నిజమైన సైనికుడిలా పనిచేశాడనీ.. తద్వారా క్రికెట్‌ ప్రమాణాలను ఉన్నత స్థాయికి తీసుకెళ్లాడని కొనియాడారు. చరిత్రలో ఎప్పటికీ ధోనీ ఓ గొప్ప కెప్టెన్‌గా మిగిలిపోతాడన్నారు. అయితే, ఆయన రిటైర్మెంట్‌కు ప్రత్యేక కారణాలేమీ ఉండకపోవచ్చని, అది కేవలం ధోనీ వ్యక్తిగత నిర్ణయమేనని అభిప్రాయపడ్డారు. అతడికి రిటైర్మెంట్‌పై స్పష్టత ఉందని చెప్పారు. తనకు అనుబంధం ఉన్న ముఖ్యమైన వ్యక్తులతో సంప్రదించి ఈ నిర్ణయం తీసుకొని ఉండి ఉండొచ్చని తాను అభిప్రాయపడుతున్నట్టు తెలిపారు.