భయం లేని యువకులు అసాధ్యాన్ని అందుకుంటారు

కైఫ్‌.. మళ్లీ నీ క్యాచ్‌ను గుర్తుచేశావు

ఇంటర్నెట్‌డెస్క్‌: టీమ్‌ఇండియా మాజీ క్రికెటర్‌ మహ్మద్‌ కైఫ్‌ మళ్లీ తను ఆడే రోజులను గుర్తుచేశాడు. మైదానంలో చురుగ్గా కదులుతూ దూరంగా వెళ్లే ఎన్నో బంతులను ఒంటి చేత్తో అందుకునే అతడు శనివారం ఓ అద్భుత వీడియోను పంచుకున్నాడు. 2004లో పాకిస్థాన్‌ పర్యటన సందర్భంగా కరాచీలో ఆడిన తొలి వన్డేలో అతడు అందుకున్న షోయబ్‌ మాలిక్‌ క్యాచ్‌ను ట్విటర్‌లో పోస్టు చేశాడు. జహీర్‌ఖాన్‌ బౌలింగ్‌లో షోయబ్‌ మాలిక్‌ ఆడిన ఓ బంతి గాల్లోకి లేవగా లాంగ్‌ఆన్‌లో ఫీల్డింగ్‌ చేస్తున్న కైఫ్‌ అమాంతం పరిగెత్తుకుంటూ వచ్చీ రెండు చేతులతో క్యాచ్‌ అందుకుంటాడు. అదే క్యాచ్‌ను అందుకోడానికి వచ్చిన హేమంగ్‌ బదానికి అతడి కాలు తగులుతుంది. 

భారత అభిమానులెవ్వరూ ఆ అద్భుత క్యాచ్‌ను ఎప్పటికీ మర్చిపోరు. దాన్ని ట్వీట్‌ చేసిన కైఫ్‌ ఇలా వ్యాఖ్యానించాడు. ‘భయం లేని యువకులు అసాధ్యాన్ని కూడా రెండు చేతులతో ఒడిసి పట్టుకుంటారు. సారీ బదాని’ అని పేర్కొన్నాడు. కాగా, ఆ మ్యాచ్‌లో తొలుత బ్యాటింగ్‌ చేసిన భారత్‌ నిర్ణీత 50 ఓవర్లలో ఏడు వికెట్లు కోల్పోయి 349 పరుగులు చేసింది. రాహుల్‌ ద్రవిడ్‌(99), వీరేందర్‌ సెహ్వాగ్‌ (79), కైఫ్‌ (46) ధాటిగా ఆడారు. అనంతరం పాక్‌ 8 వికెట్లు కోల్పోయి 344 పరుగులకు పరిమితమైంది. ఇంజమామ్‌ ఉల్‌ హక్‌(122) శతకంతో రాణించడంతో ఆ జట్టు విజయానికి చేరువైంది. చివర్లో మాలిక్‌(7) క్యాచ్‌ను కైఫ్‌ అందుకోవడంతో ఆ జట్టు ఒత్తిడి తట్టుకోలేక ఓటమిపాలైంది.