Tokyo Olympics: కొరికినందుకు క్షమించమన్నాడు: రవి కుమార్‌ దహియా

దిల్లీ: చేతి కండను కొరికినందుకు కజకిస్థాన్‌ రెజ్లర్‌ సనయేవ్‌ క్షమాపణ చెప్పాడని టోక్యో ఒలింపిక్స్‌ రజత పతక విజేత రవి దహియా చెప్పాడు. సెమీఫైనల్‌ బౌట్‌ ఆఖర్లో రవికి చిక్కిన సనయేవ్‌ వెల్లకిలా పడే క్రమంలో గట్టిగా కొరికేశాడు. ఈ దృశ్యం సామాజిక మాధ్యమాల్లో విస్తృతం అయింది. ‘‘రెజ్లింగ్‌ అంటేనే దూకుడైన ఆట. ఇందులో రెజ్లర్లు ఒక్కోసారి బాహాబాహీకీ దిగుతుంటారు. ఇవన్నీ ఈ ఆటలో చాలా చిన్న విషయాలు. సెమీఫైనల్లో సనయేవ్‌ నా చేతి కండను కొరికిన తర్వాత ఆ విషయాన్ని మర్చిపోయా. అతడిపై ఎలాంటి చెడు ఉద్దేశం పెట్టుకోలేదు. ఈ సంఘటన తర్వాత రోజు ఆటగాళ్ల బరువు తూచే దగ్గర సనయేవ్‌ ఎదురుపడ్డాడు. నా దగ్గరకు వచ్చి కరచాలనం చేసి పలకరించాడు. నేనూ అతడిని తిరిగి పలకరించాను. ఆ తర్వాత అతడు నన్ను కౌగిలించుకుని ‘క్షమించు సోదరా’ అని అన్నాడు. నేను నవ్వి అతడిని మళ్లీ కౌగిలించుకున్నా’’ అని రవి చెప్పాడు.