Michael Clarke: గర్ల్‌ఫ్రెండ్‌ చేతిలో ఆసీస్‌ మాజీ కెప్టెన్‌కు చెంప దెబ్బలు.. !

ఇంటర్నెట్ డెస్క్: తనను మోసం చేస్తున్నాడని ఆస్ట్రేలియా మాజీ కెప్టెన్‌ మైకెల్‌ క్లార్క్‌పై ఓ మహిళ చేయి చేసుకొన్న సంఘటన చోటు చేసుకుంది. వేరేవారితో ఉంటూ మోసం చేస్తున్నట్లు ఆగ్రహించిన అతడి స్నేహితురాలు జేడ్‌ యార్బ్రో బహిరంగంగానే క్లార్క్‌ను చెంపదెబ్బలు కొట్టింది. దీనికి సంబంధించిన వీడియో సామాజిక మాధ్యమాల్లో వైరల్‌గా మారింది. జేడ్‌కు సర్ది చెప్పేందుకు క్లార్క్‌ ప్రయత్నించినా ఆమె ఏమాత్రం వినకుండా దాడి చేసింది. మాజీ ప్రేయసి పిప్‌ ఎడ్వర్డ్స్‌తో కలిసి మోసగించినట్లు తీవ్ర ఆరోపణలు చేసింది. శారీరక సంబంధం పెట్టుకున్నాడని విమర్శలు గుప్పించింది. ఆమెతో చేసిన చాటింగ్‌ను బయటపెట్టాలని డిమాండ్‌ చేసింది. 

ఈ సంఘటనపై మైకెల్ క్లార్క్‌ సోషల్ మీడియా వేదికగా స్పందించాడు. ‘‘ఇలాంటి సంఘటన పట్ల ప్రజలందరికీ క్షమాపణలు చెబుతున్నా. నేను అత్యంత గౌరవ స్థానంలో ఉండేందుకు మీరంతా సహకారం అందించారు. మహిళలను ఆకర్షించుకొని ఇలాంటి పరిస్థితికి దిగజారినట్లు వచ్చిన ఆరోపణలు నన్ను మానసికంగా కుంగదీశాయి’’ అని క్లార్క్‌ వెల్లడించాడు. 

బహిరంగ ప్రదేశాల్లో ఇబ్బందికరంగా ప్రవర్తించినందుకు మైకెల్ క్లార్క్, జేడ్‌ యార్బ్రోకు  క్వీన్స్‌ల్యాండ్‌ పోలీసులు జరిమానా విధించినట్లు అక్కడి స్థానిక మీడియాలో వార్తలు వచ్చాయి. పబ్లిక్‌ న్యూసెన్స్‌ కింద ఫైన్‌ విధించామని, మరే ఇతర నేరం జరిగినట్లు తమ దర్యాప్తులో తేలలేదని సదరు అధికారులు వెల్లడించారు. దర్యాప్తు పూర్తి చేసినట్లు స్పష్టం చేశారు. మరోవైపు ప్రస్తుతం బీసీసీఐ కామెంటేటరీ ప్యానెల్‌లో సభ్యుడిగా ఉన్న క్లార్క్‌ను తొలగించే అవకాశాలు మెండుగా ఉన్నాయి. వచ్చే నెలలో భారత్, ఆస్ట్రేలియా జట్ల మధ్య టెస్టు, వన్డే సిరీస్‌లు జరగనున్న విషయం తెలిసిందే.