Copa America: ఈ విజయం డీగోకు అంకితం: మెస్సీ

ఇంటర్నెట్‌డెస్క్‌: అర్జెంటీనా స్టార్‌ కెప్టెన్‌ లియొనల్‌ మెస్సీ ఆదివారం సాధించిన కోపా అమెరికా ఫైనల్‌ కప్పును అక్కడి కరోనా బాధితులకు, దివంగత దిగ్గజ ఆటగాడు డీగో మారడోనాకు అంకితమిచ్చాడు. ఫైనల్లో బ్రెజిల్‌ను 1-0తో చిత్తు చేసిన అర్జెంటీనా 28 ఏళ్ల సుదీర్ఘ విరామం తర్వాత ఆ కప్పును ముద్దాడింది. దీంతో ఆ దేశ ఆటగాళ్లు, అభిమానులు సంతోషంలో మునిగిపోయారు. ఇది మెస్సీ కెరీర్‌లో అతిపెద్ద అంతర్జాతీయ టోర్నీ విజయం కావడం విశేషం. ఈ నేపథ్యంలోనే తాజాగా ఇన్‌స్టాగ్రామ్‌లో స్పందించిన అతడు జట్టు విజయాన్ని కొవిడ్‌ బాధిత కుటుంబాలకు, గతేడాది మరణించిన దిగ్గజ ఫుట్‌బాల్‌ ఆటగాడు డీగో మారడోనాకు అంకితమిస్తున్నట్లు చెప్పాడు.

‘నేనీ విజయాన్ని నా కుటుంబసభ్యులకు, స్పేహితులకు, 45 మిలియన్ల అర్జెంటీనా ప్రజలకు, ముఖ్యంగా ఈ కరోనా కష్టకాలంలో బాధితులుగా మిగిలిన ప్రతి ఒక్కరికీ అంకితమిస్తున్నా. అలాగే గతేడాది కన్నుమూసిన డీగోకు కూడా. ఆయన ఎక్కడున్నా మమ్మల్ని ప్రోత్సహిస్తుంటాడనే నమ్మకం ఉంది. అయితే, ఈ విజయోత్సవాలను మరింత ఎక్కువగా జరుపుకునే క్రమంలో మనమంతా కొవిడ్‌ మహమ్మారి పూర్తిగా తొలగిపోలేదని మర్చిపోవద్దు. ఈ విజయంతో లభించిన సంతోషం వల్ల కాస్త అయినా బలం తెచ్చుకొని వైరస్‌పై కలిసికట్టుగా పోరాడుదాం. ఈ సందర్భంగా నాకన్నీ ఇచ్చిన ఆ దేవుడికి ధన్యవాదాలు. అలాగే నన్ను అర్జెంటైన్‌గా పుట్టించినందుకు మరీ మరీ కృతజ్ఞతలు’ అని మెస్సీ భావోద్వేగపూరిత పోస్టు పెట్టాడు.