Lovlina's Olympics semifinal: లవ్లీనా మ్యాచ్‌ కోసం అసెంబ్లీ సమావేశాలు 30 నిమిషాలు వాయిదా..!

గువాహటి: టోక్యో ఒలింపిక్స్‌లో బాక్సింగ్‌ విభాగంలో దూసుకుపోతున్న లవ్లీనా బొర్గొహైన్‌ సెమీఫైనల్‌ మ్యాచ్‌ సందర్భంగా అసెంబ్లీ సమావేశాలను అస్సాం ప్రభుత్వం 30 నిమిషాలపాటు వాయిదా వేసే అవకాశం ఉంది. లవ్లీనా బుధవారం టర్కీకి చెందిన ప్రపంచ ఛాంపియన్‌ బుసెనాజ్‌ సుర్మెనెలితో తలపడనుంది. ఈ నేపథ్యంలో ప్రస్తుతం జరుగుతున్న బడ్జెట్‌ సమావేశాలను ఉదయం 11 గంటల నుంచి 30 నిమిషాలపాటు వాయిదా వేసే యోచనలో ప్రభుత్వం ఉన్నట్టు సమాచారం. ఈ మేరకు స్పీకర్‌కు ప్రతిపాదనలు పంపినట్టు డిప్యూటీ స్పీకర్‌ డాక్టర్‌ నుముల్‌ మొమిన్‌ సూచనప్రాయంగా తెలిపారు. అయితే ఈ అంశంపై ఇప్పటివరకు అధికారిక నిర్ణయం వెలువడలేదు.

టోక్యో ఒలింపిక్స్‌లో మహిళల బాక్సింగ్‌ విభాగంలో బరిలో దిగిన భారత బాక్సర్‌ లవ్లీనా బొర్గొహైన్‌.. 69 కిలోల విభాగంలో సత్తా చాటింది. క్వార్టర్స్ పోరులో చైనీస్‌ తైపీకి చెందిన మాజీ ప్రపంచ ఛాంపియన్‌ నీన్‌-చిన్‌పై 4-1 తేడాతో ఘన విజయం సాధించి సెమీస్‌ బెర్తు ఖరారు చేసుకుంది. బుధవారం జరగబోయే కీలక మ్యాచ్‌లో గెలిస్తే ఆమె ఫైనల్‌కు వెళ్తుంది. ఒకవేళ ఆ మ్యాచ్‌లో ఓడినా ఆమెకు కాంస్యం దక్కుతుంది. లవ్లీనా కంటే ముందు విజేందర్‌ సింగ్‌, మేరీ కోమ్‌లు మాత్రమే బాక్సింగ్‌లో భారత్‌కు పతకాలు సాధించిపెట్టారు.