KL Rahul - Athiya: వాంఖడే వన్డే హీరో కేఎల్‌ రాహుల్‌కి... అతియా ప్రత్యేక సందేశం

ఇంటర్నెట్‌ డెస్క్‌: టీమ్‌ ఇండియా స్టార్‌ ఆటగాడు కేఎల్‌ రాహుల్‌ (KL Rahul) భారీ స్కోర్‌ చేయడంపై సర్వత్రా హర్షం వ్యక్తమవుతోంది. ఈ క్రమంలో ఆయన జీవిత భాగస్వామి అతియా శెట్టి (Athiya Shetty) ఇన్‌స్టా వేదికగా  రాహుల్‌కు ప్రత్యేకమైన సందేశం పంపింది. తన ఇన్‌స్టా స్టోరీస్‌లో కేఎల్‌, జడేజా ఫొటోను ఆమె పంచుకుంది. ‘‘నాకు తెలిసిన అత్యంత దృఢమైన వ్యక్తి కేఎల్‌ రాహుల్‌’’ అని దానికి క్యాప్షన్‌ ఇచ్చింది. ఈ ఏడాది జనవరిలో  కేఎల్‌ రాహుల్‌ (KL Rahul) తన ప్రియురాలు, నటి అతియా శెట్టి (Athiya Shetty) మెడలో మూడు ముళ్లు వేసిన విషయం తెలిసిందే. 

ఆసీస్‌తో జరిగిన మ్యాచ్‌లో రాహుల్‌ ఆటతీరుపై  హార్దిక్‌ పాండ్య సైతం ప్రశంసలు కురిపించాడు. ‘‘ఈ రోజు మా ఆట చూసి గర్వపడుతున్నా. ఎనిమిది నెలలుగా వన్డేలకు దూరంగా ఉన్న జడేజా అద్భుతంగా రాణించాడు. నా బౌలింగ్, బ్యాటింగ్‌ని నేను ఎంజాయ్‌ చేశాను. కేఎల్‌, జడ్డూ బ్యాటింగ్‌ చేసిన విధానం.. విమర్శకుల నోరు మూయించింది’’ అని పాండ్య పేర్కొన్నాడు.

కేఎల్‌ రాహుల్‌ గత కొంతకాలంగా భారీ స్కోరు సాధించట్లేదు. దీంతో ఇటీవల ఆస్ట్రేలియాతో జరిగిన మూడు, నాలుగు టెస్టుల్లో స్థానం కోల్పోయాడు. ఈ నేపథ్యంలో శుక్రవారం ఆస్ట్రేలియాతో తొలి వన్డేలో ఐదో స్థానంలో బ్యాటింగ్‌కి వచ్చాడు. అయినప్పటికీ తనపై వచ్చిన విమర్శలన్నిటికీ బ్యాట్‌తో సమాధానం చెబుతూ 91 బంతుల్లో 75 పరుగులు చేసి అజేయంగా నిలిచాడు. కష్టకాలంలో జడేజా సహకారంతో భారత్‌కు అండగా నిలబడి జట్టును విజయ తీరాలకు చేర్చాడు.