Sourav Ganguly: ఆస్పత్రి నుంచి గంగూలీ డిశ్చార్జి.. రెండు వారాలు హోం ఐసోలేషన్‌లోనే!

కోల్‌కతా: బీసీసీఐ అధ్యక్షుడు సౌరభ్‌ గంగూలీ ఆస్పత్రి నుంచి డిశ్చార్జి అయ్యారు. కరోనా బారినపడిన గంగూలీ సోమవారం రాత్రి కోల్‌కతాలోని వుడ్‌ల్యాండ్‌ ఆస్పత్రిలో చేరిన విషయం తెలిసిందే. అయితే, ఆయనకు ఒమిక్రాన్‌ పరీక్షలు కూడా నిర్వహించగా నెగెటివ్‌ వచ్చినట్టు తెలుస్తోంది. ప్రస్తుతం గంగూలీ ఆరోగ్యంగానే ఉన్నారని, హోం ఐసోలేషన్లో ఉండాలని వైద్యులు సూచించారు.  ‘ఈ మధ్యాహ్నం గంగూలీని డిశ్చార్జి చేశాం. మరో రెండు వారాల పాటు వైద్యుల పర్యవేక్షణలోనే ఆయన హోం ఐసోలేషన్‌లోనే ఉండనున్నారు. ఆ తర్వాత తదుపరి చికిత్సపై నిర్ణయం తీసుకుంటాం’’ అని ఆస్పత్రి వర్గాలు పేర్కొన్నాయి.  గంగూలీకి ఇప్పటికే రెండు డోసుల వ్యాక్సినేషన్‌ పూర్తయింది. 49 ఏళ్ల గంగూలీకి ఈ ఏడాది యాంజియోప్లాస్టీ జరిగిన విషయం తెలిసిందే.

► Read latest Sports News and Telugu News