Delhi: దిల్లీ జట్టులో కరోనా కలకలం.. ఆటగాడికి పాజిటివ్‌..!

ఇంటర్నెట్‌డెస్క్‌: ప్రస్తుతం జరుగుతోన్న మెగా టీ20 లీగ్‌లో మళ్లీ కొవిడ్‌ భయం నెలకొంది. తాజాగా ఓ దిల్లీ ఆటగాడికి కరోనా పాజిటివ్‌గా తేలిందని సమాచారం. అయితే, అతడి వివరాలు తెలియరాలేదు. దీంతో ఆ జట్టులోని మిగతా ఆటగాళ్లందర్నీ ప్రస్తుతం క్వారంటైన్‌కి తరలించారు. ఈ నేపథ్యంలో ఆ జట్టు.. పంజాబ్‌తో ఆడాల్సిన తదుపరి మ్యాచ్‌పై సందేహాలు నెలకొన్నాయి.

కాగా, ఇంతకుముందే దిల్లీ జట్టులో ఒక ఫిజియోకు కరోనా సోకిన సంగతి తెలిసిందే. ఈ క్రమంలోనే ఆటగాళ్లకు యాంటిజెన్‌ పరీక్షలు చేయగా ఒకరికి పాజిటివ్‌గా తేలిందని తెలుస్తోంది. దీంతో ఆ జట్టులో ప్రస్తుతం ఆందోళన నెలకొంది. అయితే, వీరికి ఆర్టీపీసీఆర్‌ పరీక్షలు చేయించాల్సి ఉంది. మరోవైపు గతేడాది 14వ సీజన్‌లోనూ బయోబబుల్‌లో పలువురు ఆటగాళ్లు కరోనా బారిన పడిన సంగతి తెలిసిందే. అప్పుడు టోర్నీని మధ్యలోనే నిలిపివేసి.. పరిస్థితులు చక్కబడ్డాక తిరిగి సెప్టెంబర్‌-అక్టోబర్‌ నెలల్లో దుబాయ్‌లో మిగతా టోర్నీని పూర్తి చేశారు. ఒకవేళ ఇప్పుడు కేసులు పెరిగితే నిర్వాహకులు ఏం చేస్తారనేది చూడాలి.