Team India: టీమ్ఇండియాకు ఎంపికైతే షారుఖ్‌ అదరగొడతాడు

ఇంటర్నెట్‌డెస్క్‌: టీమ్‌ఇండియాకు ఆడే అవకాశం వస్తే తమిళనాడు బ్యాట్స్‌మన్‌ షారుఖ్‌ ఖాన్‌ అద్భుతంగా రాణిస్తాడని, అతడేంటో నిరూపించుకుంటాడని వెటరన్‌ క్రికెటర్‌ దినేశ్‌ కార్తీక్‌ పేర్కొన్నాడు. షారుఖ్‌ త్వరలోనే జాతీయ జట్టుకు ఎంపికవుతాడని చెప్పాడు. ఈ యువ బ్యాట్స్‌మన్‌ ఇటీవల దేశవాళీ క్రికెట్‌లో అద్భుతంగా రాణించాడు. సయ్యద్‌ ముస్తాక్‌ అలీ, విజయ్‌ హజారే ట్రోఫీల్లో క్లిష్ట పరిస్థితుల్లో రాణించి తమిళనాడుకు మంచి విజయాలు అందించాడు. దీంతో ఆ జట్టులో కీలక ఆటగాడిగా కొనసాగుతున్నాడు. ఈ నేపథ్యంలోనే త్వరలో టీమ్‌ఇండియాకు ఎంపికైతే అతడేంటో నిరూపించుకుంటాడని డీకే పూర్తి నమ్మకంతో ఉన్నాడు.

‘తమిళనాడు ఆటగాళ్లు బాగా రాణిస్తుండటం కెప్టెన్‌గా నాకు అమితమైన సంతోషాన్ని కలిగిస్తోంది. ఎందుకంటే ఈ జట్టు నుంచి ఇప్పటికే చాలా మంది ఆటగాళ్లు టీమ్‌ఇండియాకు ప్రాతినిధ్యం వహించారు. ఇప్పుడున్న యువకులు కూడా జాతీయ జట్టుతో పాటు ఐపీఎల్‌లో రాణించాలనుకుంటున్నారు. వాళ్లు బాగా ఆడితేనే ఇదంతా సాధ్యమవుతుంది. ఇటీవల దేశవాళీ క్రికెట్‌లో మా జట్టు అద్భుతమైన ప్రదర్శన చేసింది. దీంతో గతేడాది ఐపీఎల్‌లో మా జట్టు నుంచి 14 మంది ఆటగాళ్లు ఐపీఎల్‌లో వివిధ జట్లకు ప్రాతినిధ్యం వహించారు. ఇంత మంది అలా మెగా ఈవెంట్‌లో పాలుపంచుకోవడం నాకు ఆనందంగా ఉంది’ అని సీనియర్‌ బ్యాట్స్‌మన్‌ చెప్పుకొచ్చాడు. అనంతరం షారుఖ్‌పై స్పందిస్తూ.. ‘షారుఖ్‌ టీమ్‌ఇండియా తలుపులు తట్టడానికి సిద్ధంగా ఉన్నాడు. అందుకు చాలా దగ్గరగా ఉన్నాడు. త్వరలోనే అతడు ఎంపికవుతాడు. అతడికి అవకాశం వచ్చినప్పుడు రాణిస్తాడని చెప్పడంలో నాకెలాంటి సందేహం లేదు. టీమ్‌ఇండియా తరఫున అదరగొడతాడు’ అని కార్తీక్‌ వివరించాడు.