Team India: మేం ఆధిక్యంలో ఉన్నామన్న విషయం మర్చిపోవద్దు

మైఖేల్ వాన్‌కు వసీం జాఫర్‌ అదిరిపోయే రిప్లై

ఇంటర్నెట్‌ డెస్క్‌ : ఇంగ్లాండ్‌ మాజీ ఆటగాడు మైఖేల్‌ వాన్‌కు టీమ్ఇండియా మాజీ ఆటగాడు వసీం జాఫర్‌ అదిరిపోయే రిప్లై ఇచ్చాడు. దక్షిణాఫ్రికాతో జరిగిన మూడు టెస్టుల సిరీస్‌లో టీమ్ఇండియా 1-2 తేడాతో ఓటమి పాలైన విషయం తెలిసిందే. భారత్‌కి ఎదురైన ఈ పరాజయాన్ని ఉద్దేశిస్తూ మైఖేల్‌ వాన్‌ ఓ ట్వీట్‌ చేశాడు. ‘గుడ్ ఈవెనింగ్‌ వసీం జాఫర్‌.. బాగానే ఉన్నావా? జస్ట్‌.. ఊరికే అడుగుతున్నానంతే.!’ అని ట్వీట్‌ చేశాడు. దీనిపై స్పందించిన వసీం జాఫర్ దీటుగా బదులిచ్చాడు. ‘అంతా బాగానే ఉంది మైఖేల్‌.. మీ జట్టుపై మేం 2-1 ఆధిక్యంలో ఉన్నామన్న విషయం మర్చిపోవద్దు’ అని సమాధానమిచ్చాడు.

గత ఇంగ్లాండ్‌ పర్యటనలో టీమ్‌ఇండియా అద్భుతంగా రాణించిన విషయం తెలిసిందే. ఐదు టెస్టుల సిరీస్‌లో భాగంగా ఇప్పటి వరకు నాలుగు టెస్టు మ్యాచులు పూర్తయ్యాయి. ట్రెంట్ బ్రిడ్జ్‌లో జరిగిన తొలి టెస్టు డ్రాగా ముగిసిన విషయం తెలిసిందే. అనంతరం లార్డ్స్‌లో జరిగిన రెండో టెస్టులో టీమ్‌ఇండియా 151 పరుగుల తేడాతో ఆతిథ్య ఇంగ్లాండ్‌పై ఘన విజయం సాధించింది. మూడో టెస్టులో భారత్‌ 76 పరుగుల తేడాతో పరాజయం పాలైంది. దీంతో 1-1తో సిరీస్‌ సమమైంది. ఇక, ఓవల్ వేదికగా జరిగిన నాలుగో టెస్టులో భారత జట్టు గొప్పగా పుంజుకుంది. ఇంగ్లాండ్‌ను 157 పరుగుల తేడాతో ఓడించి.. ఐదు టెస్టుల సిరీస్‌లో 2-1 తేడాతో ఆధిక్యంలో నిలిచింది. అయితే, కరోనా కారణంగా చివరిదైన ఐదో టెస్టు నిరవధికంగా వాయిదా పడిన విషయం తెలిసిందే.