FIFA World Cup : బైనాక్యులర్‌లో ఆల్కహాల్‌ తీసుకువచ్చి.. సెక్యూరిటీకి చిక్కి..

ఇంటర్నెట్‌ డెస్క్‌:  ఫిఫా ప్రపంచకప్‌ పోటీలు ఉత్కంఠభరితంగా సాగుతున్నాయి. తమ జట్లకు మద్దతు తెలిపేందుకు భారీ సంఖ్యలో అభిమానులు స్టేడియాలకు తరలివస్తున్నారు. అయితే ఈ సారి మైదానాల్లో ఆల్కహాల్‌ వినియోగంపై నిషేధం విధించడం.. పలువురిని నిరాశకు గురిచేసింది. దీంతో దొంగదారుల్లో స్టేడియంలోకి మద్యం తీసుకొచ్చేందుకు అభిమానులు యత్నిస్తున్నట్లు తెలుస్తోంది. తాజాగా ఓ అభిమాని ఎవరికీ దొరక్కుండా ఉండేందుకు బైనాక్యులర్‌లో మద్యం తీసుకొచ్చాడు. చివరికి సెక్యూరిటీకి చిక్కాడు. ఇందుకు సంబంధించిన వీడియో వైరల్‌గా మారింది.

ఓ మెక్సికో అభిమాని బైనాక్యులర్‌ మధ్య భాగంలో చిన్న డబ్బా ఏర్పాటు చేసుకొని.. అందులో మద్యం తీసుకొచ్చాడు. అయితే భద్రతా సిబ్బందికి అనుమానం వచ్చి పరిశీలించాడు. దాని లెన్స్‌ తొలగించి చూడగా  అసలు విషయం బయటపడింది. ఇదేంటని అడిగితే.. హ్యాండ్‌ శానిటైజర్‌ అని ఆ అభిమాని చెప్పడం గమనార్హం.

ఇస్లామిక్‌ దేశాల్లో ఆల్కహాల్‌పై ఎక్కువగా నిషేధం ఉంటుంది. ఖతార్‌లో ఈ ప్రపంచకప్‌ ప్రారంభానికి రెండు రోజుల ముందే.. స్టేడియం పరిసరాల్లో బీర్ల అమ్మకాలపై బ్యాన్‌ విధించడం అభిమానులను నిరాశకు గురిచేసింది. మ్యాచ్‌లు జరిగే ఎనిమిది స్టేడియం పరిసరాల్లో ఎట్టిపరిస్థితుల్లోనూ అభిమానులకు బీర్లు విక్రయించకూడదని ఫిఫా వెల్లడించింది.