Arshdeep singh: మమ్మల్ని తిట్టే హక్కు వారికుంది: ట్రోలింగ్‌పై స్పందించిన అర్ష్‌దీప్‌

దిల్లీ: ఆసియా కప్‌ 2022 సూపర్‌ 4లో భాగంగా 5 వికెట్ల తేడాతో భారత్‌పై పాకిస్థాన్‌ గెలుపొందిన విషయం తెలిసిందే. ఈ మ్యాచ్‌లో అసిఫ్‌ అలీ అందించిన క్యాచ్‌ను టీమ్‌ఇండియా ఫాస్ట్‌ బౌలర్‌ అర్ష్‌దీప్‌ సింగ్‌ వదిలేయడం కూడా ఓటమికి గల కారణాల్లో ఒకటిగా నిలిచింది. దీంతో సామాజిక మాధ్యమాల్లో అతడిపై తీవ్ర స్థాయిలో ట్రోలింగ్‌ జరిగింది. అతడి వికీపీడియా పేజీలో ‘‘అర్ష్‌దీప్‌ ఖలిస్థానీ నేషనల్‌ క్రికెట్‌కు ఆడటానికి ఎంపికయ్యాడు’’ అని కొందరు వ్యక్తులు మార్పులు చేశారు. ఈ విషయంపై స్పందించిన కేంద్ర ఎలక్ట్రానిక్‌, సమాచార సాంకేతిక శాఖ.. వికీపీడియా సంబంధిత అధికారులను వివరణ కోరింది. ఆ సమయంలో తనపై జరిగిన ట్రోలింగ్‌ గురించి తాజాగా అర్ష్‌దీప్‌ స్పందించాడు. 

‘‘క్రికెటర్లను, వారి ఆటను అభిమానులు ఎంతో ప్రేమిస్తారు. బాగా ఆడినప్పుడు ఎంత ఆనందపడతారో.. ఆడలేకపోయినప్పుడు సైతం అంతే అసంతృప్తి వ్యక్తం చేస్తారు. దేశం తరఫున ఆడుతున్నాం కాబట్టే మా విషయంలో వారు అంతలా భావోద్వేగానికి లోనవుతుంటారు. మాపై కోపగించుకునే హక్కు వారికుంది. క్రికెటర్‌గా ఆ రెండింటినీ మేం స్వీకరించాల్సివుంటుంది’’ అంటూ ఈ యువ ఆటగాడు తెలిపాడు. టీ20 ప్రపంచకప్‌ అనంతరం న్యూజిలాండ్‌తో వన్డేల్లో ఈ ఫాస్ట్‌బౌలర్‌  అరంగేట్రం చేసిన విషయం తెలిసిందే.