IND vs AUS: భారత్‌ X ఆసీస్‌.. బౌలర్లు ముగించారు.. బ్యాటర్లు ఆరంభించారు..!

ఇంటర్నెట్ డెస్క్‌: బోర్డర్ - గావస్కర్ (Border - Gavaskar Trophy) ట్రోఫీలో భాగంగా ఆస్ట్రేలియాతో జరుగుతున్న తొలి టెస్టు మ్యాచ్‌ (IND vs AUS) మొదటి రోజు ఆట ముగిసింది. టాస్‌ నెగ్గిన ఆసీస్‌ బ్యాటింగ్‌ ఎంచుకొంది. తొలుత బ్యాటింగ్‌ చేసిన ఆసీస్‌ తన తొలి ఇన్నింగ్స్‌లో 177 పరుగులకే కుప్పకూలింది. అనంతరం మొదటి రోజు ఆట ముగిసేసమయానికి టీమ్‌ఇండియా తొలి ఇన్నింగ్స్‌లో వికెట్ నష్టానికి  77 పరుగులు చేసింది. కెప్టెన్‌ రోహిత్ శర్మ (56*) (Rohit Sharma) దాదాపు రెండేళ్ల తర్వాత టెస్టుల్లో అర్ధశతకం బాదాడు. తొలి రోజు మరో ఏడు బంతుల్లో ముగుస్తుందనగా.. కేఎల్ రాహుల్‌ (20) మర్ఫీ బౌలింగ్‌లో కాట్‌ అండ్‌ బౌల్‌ అయ్యాడు. దీంతో 76 పరుగుల తొలి వికెట్‌ భాగస్వామ్యానికి తెరపడింది. క్రీజ్‌లో రోహిత్‌తోపాటు  నైట్‌వాచ్‌మన్‌గా వచ్చిన రవిచంద్రన్ అశ్విన్ ఉన్నాడు. 

జడ్డూ మాయ.. అశ్విన్ అనుభవం

నాగ్‌పుర్ పిచ్‌ స్పిన్‌కు అనుకూలమని అంతా అంచనా వేశారు. కానీ, అనూహ్యంగా భారత పేసర్లు షమీ (1/18), సిరాజ్‌ (1/30) ఆరంభంలోనే ఆసీస్‌ ఓపెనర్లు ఖవాజా (1), డేవిడ్ వార్నర్ (1)ను ఔట్‌ చేసి టీమ్‌ఇండియాకు బ్రేక్‌ ఇచ్చారు. ఆ తర్వాత స్పిన్నర్లను రంగంలోకి దింపిన కెప్టెన్‌ రోహిత్ ఫలితం రాబట్టాడు. లబుషేన్ (49: 123 బంతుల్లో), స్టీవ్‌ స్మిత్ (37: 107 బంతుల్లో) కాసేపు అడ్డుపడినా.. భారత బౌలర్ల దెబ్బకు ఆసీస్‌ 200లోపే కుప్పకూలింది. ఈ క్రమంలో రవీంద్ర జడేజా (5/47) ఐదు వికెట్ల ప్రదర్శన చేయగా.. అశ్విన్ (3/42) దెబ్బకు ఆసీస్ హడలెత్తిపోయింది. 

రెండో రోజు నిలబడితే చాలు.. 

కాస్త  ఓపికగా క్రీజ్‌లో నిలబడటంతోపాటు అవసరమైన సందర్భంలో దూకుడు ప్రదర్శిస్తే మాత్రం పరుగులు చేయడం పెద్ద కష్టమేమీ కాదని ఇప్పటికే లబుషేన్, స్టీవ్‌ స్మిత్, అలెక్స్‌ క్యారీతోపాటు భారత కెప్టెన్ రోహిత్ శర్మ నిరూపించారు. ఇంకా మరో 100 పరుగులు మాత్రమే వెనుకబడి ఉన్న టీమ్‌ఇండియా రెండో రోజు మొత్తం బ్యాటింగ్‌ చేస్తే తొలి టెస్టులో పై చేయి సాధించడం కష్టమేం కాదు. ఆసీస్‌పై కనీసం 200 పరుగుల తొలి ఇన్నింగ్స్‌ ఆధిక్యం సాధిస్తే మాత్రం భారత్‌ విజయాన్ని ఆపడం ఎవరి తరమూ కాకపోవచ్చు. తొలి రోజే స్పిన్‌కు అనుకూలంగా మారిన నాగ్‌పుర్ పిచ్‌.. గడిచే కొద్దీ స్పిన్నర్ల పాలిట స్వర్గధామంగా మారుతుందనడంలో సందేహం లేదు. ఇప్పుడు క్రీజ్‌లో ఉన్నవారే కాకుండా విరాట్, ఛెతేశ్వర్ పుజారా, సూర్యకుమార్‌, రవీంద్ర జడేజా, భరత్, అక్షర్ బ్యాటింగ్‌ చేయాల్సి ఉంది.