Yoga: తొలి యోగాసన ప్రపంచ ఛాంపియన్‌షిప్‌.. ఎక్కడ? ఎప్పుడంటే?

దిల్లీ: యోగాని ప్రపంచానికి పరిచయం చేసిన భారత్‌.. తొలిసారిగా యోగాసన ప్రపంచ ఛాంపియన్‌షిప్‌ పోటీలను నిర్వహించనుంది. వచ్చే ఏడాది జూన్‌లో ఒడిశాలోని భువనేశ్వర్‌లో ఈ పోటీలను నిర్వహించనున్నట్లు ది నేషనల్‌ యోగాసన స్పోర్ట్స్‌ ఫెడరేషన్‌(ఎన్‌వైఎస్‌ఎఫ్‌) వెల్లడించింది ఈ యోగా పోటీల కోసం పెద్ద ఎత్తున ఏర్పాట్లు చేస్తున్నట్లు పేర్కొంది. ‘‘భారత్‌.. తొలిసారిగా ప్రపంచ యోగాసన ఛాంపియన్‌షిప్‌ను నిర్వహించనుంది. జూన్‌ 2022లో జరగబోయే ఈ టోర్నీ భారతదేశ ప్రాచీన క్రీడను ప్రపంచానికి చూపించబోతుంది’’అని ఎన్‌వైఎస్‌ఎఫ్‌ అధ్యక్షుడు ఉదిత్‌ సేథ్‌ అన్నారు. యోగాసన పోటీలకు ఆతిథ్యం ఇవ్వనున్న ఒడిశా ప్రభుత్వానికి కృతజ్ఞతలు తెలిపారు.

ఈ ఏడాది జరిగిన ఖేల్‌ ఇండియా యూత్‌ గేమ్స్‌లో యోగాను కూడా చేర్చిన విషయం తెలిసిందే. మహిళలు, పురుషులు రెండు విభాగాల్లో పోటీలు నిర్వహించారు. ఆ పోటీలు విజయవంతం కావడంతో ప్రత్యేకంగా యోగాసన పోటీల్ని అంతర్జాతీయంగా.. అన్ని కేటగిరిల్లో నిర్వహించేందుకు, ఈ క్రీడోత్సవానికి ఆర్థిక సాయం చేసేందుకు కేంద్రం సమ్మతించింది. ప్రపంచమంతా ఏటా జూన్‌ 21న అంతర్జాతీయ యోగా దినోత్సవాన్ని ఘనంగా జరుపుకుంటోంది. ఈ నేపథ్యంలో జూన్‌లో యోగాసన ప్రపంచ ఛాంపియన్‌షిప్‌ నిర్వహణకు సన్నాహాలు జరుగుతున్నాయి. పోటీల్లో విజేతలను యోగా దినోత్సవం నాడు ప్రకటించే అవకాశం ఉంది.