WWE మాజీ రెజ్లర్‌ సారా లీ హఠాన్మరణం

ఇంటర్నెట్ డెస్క్‌: వరల్డ్ రెజ్లింగ్‌ ఎంటర్‌టైన్‌మెంట్ (WWE) మాజీ రెజ్లర్‌ సారా లీ (30) హఠాన్మరణం చెందింది. 2015లో WWE రియాల్టీ కాంపిటేషన్‌ విజేత అయిన సారా మృతి చెందినట్లు ఆమె తల్లి టెర్రీ లీ వెల్లడించారు. మమ్మల్ని దిగ్భ్రాంతికి గురి చేస్తూ సారా వెస్టన్‌ లీ దేవుడి వద్దకు చేరిందని ఆమె పేర్కొన్నారు. సారా లీ హఠాన్మరణంపై రెజ్లింగ్‌ ప్రపంచం ఒక్కసారిగా షాక్‌కు గురైంది. తమ సంతాపాలను తెలియజేస్తూ సోషల్‌ మీడియా వేదికగా సందేశాలు పెట్టారు.

డబ్ల్యూడబ్ల్యూఈ రెజ్లర్‌ నిక్కి యాష్‌ స్పందిస్తూ.. ఫ్యామిలీ, ఫ్రెండ్స్‌ ఇలా ప్రతి ఒక్కరినీ ప్రేమించే సారా దూరం కావడం బాధాకరమని పేర్కొంది. మరో రెజ్లర్‌ చెల్సీ గ్రీన్‌.. ‘‘ఏం మాట్లాడాలో.. ఏమని ట్వీట్‌ చేయాలో తెలియడం లేదు. ఇంత మంచి మనిషిని తిరిగి ఇవ్వాలని దేవుడిని కోరుతున్నా. సారా లీ కుటుంబ సభ్యులకు నా ప్రగాఢ సానుభూతి. ఆమె నవ్వుతూ, హాయిగా, స్వేచ్ఛగా ఉన్న ఫొటోను ఎప్పటికీ మరిచిపోలేను’’ అని ఆవేదన వ్యక్తం చేస్తూ ఫొటోలను షేర్‌ చేసింది.