Cricket: నాన్‌స్ట్రైకర్‌ రనౌట్‌.. బ్యాట్‌ విసిరి కొట్టిన బ్యాటర్

క్రికెట్‌లో ఇప్పుడు నాన్‌ స్ట్రైకింగ్‌ రనౌట్ అధికారికమేనని తెలిసిన విషయమే. కానీ, అలా రనౌట్‌ అయిన బ్యాటర్‌ మాత్రం తమ అసంతృప్తిని వ్యక్తపరచడానికి ఏమాత్రం వెనుకాడటం లేదు. కీలకమైన సమయంలో ఔట్‌ కావడంతో మరింత ఆగ్రహానికి గురవుతున్నారు. ఇలాంటి సంఘటన ఆస్ట్రేలియా దేశవాళీ క్రికెట్‌లో చోటు చేసుకుంది.

Updated : 28 Mar 2023 17:35 IST

ఇంటర్నెట్ డెస్క్: ‘నాన్‌ స్ట్రైకర్‌ రనౌట్’ చట్టబద్ధం.. అంతర్జాతీయ క్రికెట్‌ కౌన్సిల్ (ICC)తోపాటు మెరిల్‌బోన్ క్రికెట్ క్లబ్‌ (MCC) పలుమార్లు స్పష్టం చేసినా సరే.. క్రీడా స్ఫూర్తి లేదంటూ క్రికెటర్లు ఆగ్రహం వ్యక్తం చేసిన సంఘటనలు వెలుగు చూస్తూనే ఉన్నాయి. తాజాగా ఆస్ట్రేలియాలో జరిగిన దేశవాళీ క్రికెట్‌ మ్యాచ్‌లో అనూహ్య సంఘటన చోటు చేసుకుంది. ఇలాగే నాన్‌ స్ట్రైకర్‌ రనౌట్‌ అయిన కాసేపటి సదరు బాధిత బ్యాటర్ కోపం పట్టలేకపోయాడు. ఆగ్రహంతో బ్యాట్‌, గ్లోవ్స్‌ను విసిరికొట్టాడు. ఆ వీడియో సోషల్‌ మీడియాలో వైరల్‌గా మారింది. 

ఆస్ట్రేలియాలో క్లార్‌మోంట్, న్యూ నోర్‌ఫోక్‌ జట్ల మధ్య మ్యాచ్‌ జరిగింది. క్లార్‌మోంట్‌ బ్యాటర్‌ జారోడ్ కయే (43) నాన్‌ స్ట్రైకింగ్‌లో ఉన్నాడు. హాఫ్‌ సెంచరీకి చేరువగా ఉన్నాడు. అయితే ప్రత్యర్థి జట్టు బౌలర్ దెబ్బకు నాన్‌ స్ట్రైకింగ్‌ ఎండ్‌లో ఉన్న జారోడ్‌ రనౌట్‌ రూపంలో పెవిలియన్‌కు చేరాడు. రనౌట్‌పై ఫీల్ట్ అంపైర్‌ థర్డ్‌ అంపైర్‌కు నివేదించగా.. ఔట్‌గా తేలింది. తీవ్ర అసహనంతో జారోడ్ బ్యాటర్‌ విసిరి కొట్టాడు. అలాగే చేతికి ఉన్న గ్లవ్స్‌ను కూడా గిరాటేశాడు. కీలక సమయంలో ఔట్‌ కావడంతో ఇలా ఆగ్రహానికి గురయ్యాడు. అంతకుముందు తొలుత బ్యాటింగ్‌ చేసిన నూ నోర్‌ఫోక్ 50 ఓవర్లలో ఏడు వికెట్ల నష్టానికి 263 పరుగులు చేసింది. హ్యారీ బూత్ (63), జాసన్ రిగ్బే (67) అర్ధశతకాలతోపాటు థామస్‌ బ్రిస్కోయ్ (37*) దంచేశారు. అనంతరం క్లార్‌మోంట్‌ ఛేదనలో 214 పరుగులకే ఆలౌటైంది. రిక్‌ మార్టిన్‌ (70)తోపాటు జారోడ్ కీలక ఇన్నింగ్స్‌ ఆడినా జట్టును గెలిపించలేకపోయారు.


Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts

సుఖీభవ

చదువు