FIFA World Cup 2022: ‘బిష్ఠ్‌’తో మెస్సి .. అందుకే అలా..

దోహా: ఫైనల్లో ఫ్రాన్స్‌పై విజయం తర్వాత ప్రపంచకప్‌ను అందుకోవడానికి ముందు అర్జెంటీనా కెప్టెన్‌ లియొనెల్‌ మెస్సి ప్రత్యేక వస్త్రాన్ని ధరించడం ఇప్పుడు చర్చనీయాంశంగా మారింది. వేదికపై ఫిఫా అధ్యక్షుడు ఇన్‌ఫాంటినో సమక్షంలో ఖతార్‌ చక్రవర్తి షేక్‌ తమీమ్‌ బిన్‌ హమద్‌ ఈ వస్త్రాన్ని అతనికి తొడిగించారు. మరి అసలు ఆ వస్త్రం ఏమిటీ అంటే.. అది ఖతార్‌ సంప్రదాయ ‘బిష్ఠ్‌’. ప్రత్యేక సందర్భాల్లో రాజ కుటుంబీకులు, రాజకీయ నేతలు, మత గురువులు, ధనికులు తదితరులు దీన్ని ధరిస్తారు. దీన్ని వేసుకోవడం వల్ల హుందాగా, ప్రత్యేకంగా కనిపిస్తారు. ప్రపంచకప్‌ అందుకోవడం మెస్సికి ప్రత్యేక సందర్భం కాబట్టి అతనికి దీన్ని అందించారు.

అరబ్‌ యుద్ధ వీరులకు, రాజు వంశస్థులకూ ఈ వస్త్రాన్ని బహూకరిస్తారని కొంతమంది చెబుతున్నారు. కప్పు గెలిచిన మెస్సి.. ఫుట్‌బాల్‌ కింగ్‌గా మారాడు కాబట్టి అతనికి దీన్ని ప్రత్యేకంగా అందించారని అంటున్నారు. ‘‘అధికారిక, ప్రత్యేక కార్యక్రమాల్లో ఈ వస్త్రాన్ని ధరిస్తారు. ఇది మెస్సి సంబరాల సందర్భం. అందుకే అతనికి దీన్ని బహూకరించాం. అరబ్‌, ముస్లిమ్‌ సంప్రదాయాలను ప్రపంచానికి చాటేందుకు ఈ మెగా టోర్నీ మాకు అవకాశాన్ని కల్పించింది’’ అని ఖతార్‌ టోర్నీ నిర్వాహక కమిటీ కార్యదర్శి హసన్‌ అల్‌ థవాడి పేర్కొన్నాడు.