Hardik Pandya: నెహ్రా వల్లే నేనిలా..

రాజ్‌కోట్‌: కెప్టెన్‌గా తన తొలి ఐపీఎల్‌లోనే గుజరాత్‌ టైటాన్స్‌ను విజేతగా నిలిపాడు హార్దిక్‌ పాండ్య. పొట్టి ఫార్మాట్లో ఇప్పుడు టీమ్‌ఇండియా పగ్గాలు అందుకున్నాడు. సారథిగా తాను విజయవంతం కావడంలో టైటాన్స్‌ కోచ్‌ నెహ్రాది కీలక పాత్ర అని హార్దిక్‌ తాజాగా వ్యాఖ్యానించాడు. ‘‘నెహ్రా రూపంలో గుజరాత్‌ టైటాన్స్‌కు మంచి కోచ్‌ ఉన్నాడు. నేను కెరీర్‌లో ఎదిగేందుకు నెహ్రా దోహదం చేశాడు. మేం భిన్న వ్యక్తులం కావొచ్చు. కానీ మా క్రికెటింగ్‌ బుర్రలు ఒక్కటే. అతడి వల్లే నేను మరింత మెరుగ్గా కెప్టెన్సీ చేయగలుగుతున్నా. నెహ్రా నాకు మద్దతుగా నిలిచాడు’’ అని హార్దిక్‌ అన్నాడు. అతడి సారథ్యంలోని జట్టు శ్రీలంకతో టీ20 సిరీస్‌ను 2-1తో గెలుచుకున్న సంగతి తెలిసిందే. అయితే జట్టును నడిపించడం తనకంత కష్టం కాలేదని హార్దిక్‌ అన్నాడు. ‘‘జట్టుకు సారథ్యం వహించడం నాకంత కష్టం కాలేదు. అనుభవజ్ఞులైన ఆటగాళ్లు ఉండడంతో నా పని తేలికైంది. నేను వారికేమీ చెప్పను. తమ జీవితాల్లో చాలా మంచి పనులు చేయడం వల్లే వాళ్లిక్కడ ఉన్నారు’’ అని చెప్పాడు. ఆత్మవిశ్వాసాన్నివ్వడమొక్కటే జట్టులో యువ ఆటగాళ్లకు తాను చేయగలిగిన సహాయమని హార్దిక్‌ అన్నాడు. కుర్రాళ్లు నేర్చుకోవడానికి సుముఖంగా ఉన్నారని, దాని వల్ల తన ప్రయాణం తేలికవుతోందని చెప్పాడు. సూర్యకుమార్‌ తమకు చాలా ముఖ్య ఆటగాడని అన్నాడు. అతడు షాట్లు ఆడిన తీరు, ఆట స్వభావాన్ని మార్చిన తీరు లంక బౌలర్ల స్థైర్యాన్ని దెబ్బతీశాయని హార్దిక్‌ చెప్పాడు.