మెరిసిన స్మృతి, హర్మన్‌

విండీస్‌పై భారత్‌ విజయం
ముక్కోణపు టీ20 సిరీస్‌

ఈస్ట్‌ లండన్‌ (దక్షిణాఫ్రికా): ఓపెనర్‌ స్మృతి మంధాన (74 నాటౌట్‌;  51 బంతుల్లో 10×4, 1×6), కెప్టెన్‌ హర్మన్‌ప్రీత్‌ కౌర్‌ (56 నాటౌట్‌; 35 బంతుల్లో 8×4) అజేయ అర్ధసెంచరీలతో అదరగొట్టడంతో మహిళల ముక్కోణపు టీ20 సిరీస్‌లో భారత్‌ వరుసగా రెండో విజయాన్ని నమోదు చేసింది. సోమవారం జరిగిన మ్యాచ్‌లో భారత్‌ 56 పరుగుల ఆధిక్యంతో వెస్టిండీస్‌ను చిత్తుచేసింది. టాస్‌ గెలిచి తొలుత బ్యాటింగ్‌ చేసిన భారత్‌ 20 ఓవర్లలో 2 వికెట్లకు 167 పరుగులు సాధించింది. స్మృతి, హర్మన్‌ మూడో వికెట్‌కు అజేయంగా 115 పరుగులు జోడించారు. అనంతరం విండీస్‌ 20 ఓవర్లలో 4 వికెట్లకు 111 పరుగులు చేయగలిగింది. షెమైన్‌ క్యాంప్‌బెల్‌ (47; 57 బంతుల్లో 5×4, 1×6), కెప్టెన్‌ హేలీ మాథ్యూస్‌ (34 నాటౌట్‌; 29 బంతుల్లో 5×4) పోరాడినా ఫలితం లేకపోయింది. భారత బౌలర్లలో దీప్తి శర్మ (2/29), రాజేశ్వరి గైక్వాడ్‌ (1/16), రాధ యాదవ్‌ (1/10) ఆకట్టుకున్నారు. తొలి మ్యాచ్‌లో భారత్‌.. దక్షిణాఫ్రికాపై నెగ్గింది.