ఆదివారం.. ఆటలే ఆటలు

ఆదివారం క్రీడాభిమానులకు బోలెడంత వినోదం. వివిధ క్రీడల్లో కీలక మ్యాచ్‌లు అలరించబోతున్నాయి. అండర్‌-19 మహిళల టీ20 ప్రపంచకప్‌ ఫైనల్లో భారత జట్టు ఇంగ్లాండ్‌ను ఢీకొనబోతుండడంతో.. అమ్మాయిల క్రికెట్లో దేశానికి తొలి కప్పు అందుతుందా అని అభిమానులు ఉత్కంఠగా ఎదురు చూస్తున్నారు. భారత క్రీడాకారులు లేకపోయినా.. ఆదివారం ఇంకో రెండు ఫైనల్స్‌ ఆసక్తి రేకెత్తిస్తున్నాయి. నాదల్‌ పేరిట ఉన్న అత్యధిక గ్రాండ్‌స్లామ్‌ల (22) రికార్డును సమం చేయడమే లక్ష్యంగా జకోవిచ్‌.. ఆస్ట్రేలియన్‌ ఓపెన్‌ ఫైనల్లో సిట్సిపాస్‌ను ఢీకొనబోతున్నాడు. ఇక భారత్‌ ఆతిథ్యమిస్తున్న హాకీ ప్రపంచకప్‌లో మేటి జట్లు జర్మనీ, బెల్జియం టైటిల్‌ కోసం తలపడనున్నాయి. మరోవైపు భారత పురుషుల క్రికెట్‌ జట్టు.. న్యూజిలాండ్‌తో కీలకమైన రెండో టీ20 ఆడనుంది.