గుజరాత్‌ మార్గనిర్దేశకురాలిగా మిథాలి

అహ్మదాబాద్‌: భారత మహిళల క్రికెట్‌ దిగ్గజం మిథాలీరాజ్‌ కొత్త పాత్రలో కనిపించబోతోంది. ఈ సీజన్లో ఆరంభమయ్యే తొట్టతొలి మహిళల ప్రిమియర్‌ లీగ్‌లో గుజరాత్‌ జెయింట్స్‌కు మిథాలి మార్గనిర్దేశకురాలిగా వ్యవహరించనుంది. అంతేకాక ఈ బాధ్యతల్లో భాగంగా గుజరాత్‌లో అమ్మాయిల క్రికెట్‌ అభివృద్ధికి కూడా 40 ఏళ్ల మిథాలి తోడ్పాటు అందించనుంది. గుజరాత్‌ జెయింట్స్‌ జట్టును అదానీ గ్రూప్‌ రూ.1289 కోట్లతో కొనుక్కుంది. ‘‘భారత్‌లో మహిళల క్రికెట్‌ అభివృద్ధికి ఉమెన్స్‌ ప్రిమియర్‌ లీగ్‌ (డబ్ల్యూపీఎల్‌) ఓ గొప్ప ఎత్తుగడ. మహిళల క్రికెట్‌ స్థిరంగా ఎదుగుతోంది. ఈ ఆటను వృత్తిగా తీసుకునేందుకు అమ్మాయిలకు ఈ లీగ్‌ ప్రోత్సాహాన్ని అందించనుంది’’ అని మిథాలి పేర్కొంది. మహిళల అంతర్జాతీయ క్రికెట్లో అత్యధిక పరుగులు చేసిన మిథాలి.. గతేడాది 23 ఏళ్ల సుదీర్ఘ కెరీర్‌కు వీడ్కోలు చెప్పిన సంగతి తెలిసిందే.