సబలెంక.. సాధించెన్‌

తొలి గ్రాండ్‌స్లామ్‌ సింగిల్స్‌ టైటిల్‌ సొంతం
ఫైనల్లో రిబకినాపై గెలుపు
ఆస్ట్రేలియన్‌ ఓపెన్‌ కైవసం

ఆస్ట్రేలియన్‌ ఓపెన్‌ మహిళల సింగిల్స్‌ ఫైనల్‌. ఈ ఏడాది ఆడిన 10 మ్యాచ్‌ల్లోనూ ఒక్క సెట్‌ కూడా కోల్పోకుండా గెలిచిన సబలెంక  ఒకవైపు. టాప్‌సీడ్‌ స్వైటెక్‌తో సహా అగ్రశ్రేణి క్రీడాకారిణిలను ఓడించి తుదిపోరు చేరిన రిబకినా మరోవైపు. ఈ టోర్నీలో ఇద్దరికీ ఇదే తొలి ఫైనల్‌. పోరు మొదలైంది. గంటకు 190 కిలోమీటర్లకు పైగా వేగంతో సర్వ్‌లు, ఒకరిని మించి మరొకరు.. ఏస్‌లు, కళ్లు చెదిరే విన్నర్లతో సివంగుల్లా తలపడ్డారు. తొలి సెట్‌ రిబకినాదే. తొలి గ్రాండ్‌స్లామ్‌ సింగిల్స్‌ టైటిల్‌ కోసం సబలెంకాకు నిరీక్షణ తప్పదేమోనన్న అంచనాలు. కానీ బెలారస్‌ భామ వదల్లేదు. తర్వాతి రెండు సెట్లలో అద్భుతమైన ఆటతీరుతో.. ఘనంగా గ్రాండ్‌స్లామ్‌ సింగిల్స్‌ బోణీ కొట్టింది.

ఆస్ట్రేలియన్‌ ఓపెన్‌ మహిళల సింగిల్స్‌ కొత్త ఛాంపియన్‌ అరీనా సబలెంక. గ్రాండ్‌స్లామ్‌ సింగిల్స్‌లో తొలిసారి ఫైనల్‌ చేరిన ఈ 24 ఏళ్ల అమ్మాయి.. తొలి సెట్‌ కోల్పోయినా తిరిగి పుంజుకుని టైటిల్‌ను ఖాతాలో వేసుకుంది. శనివారం తుదిపోరులో ఈ అయిదో సీడ్‌ క్రీడాకారిణి 4-6, 6-3, 6-4 తేడాతో వింబుల్డన్‌ ఛాంపియన్‌ రిబకినా (కజకిస్థాన్‌)పై విజయం సాధించింది. శక్తిమంతమైన సర్వీస్‌లతో చెలరేగిన సబలెంక.. రాకెట్‌పై పూర్తి నియంత్రణతో, కచ్చితమైన ప్రదేశంలోకి బంతిని పంపిస్తూ పాయింట్లు రాబట్టింది. కానీ తొలి సెట్‌లో ఆధిపత్యం మాత్రం 22వ సీడ్‌ రిబకినాదే. మూడో గేమ్‌లో ప్రత్యర్థి అనవసర తప్పిదంతో బ్రేక్‌ పాయింట్‌ సాధించిన రిబకినా, ఆపై 3-1తో ఆధిక్యంలోకి వెళ్లింది. ఎనిమిదో గేమ్‌లో బ్యాక్‌హ్యాండ్‌ విన్నర్‌తో తొలి బ్రేక్‌ పాయింట్‌ సాధించిన సబలెంక 4-4తో స్కోరు సమం చేసింది. కానీ తర్వాతి గేమ్‌లో డబుల్‌ ఫాల్ట్‌తో సర్వీస్‌ కోల్పోవడం ఆమెను దెబ్బతీసింది. పదో గేమ్‌లో సర్వీస్‌ నిలబెట్టుకున్న రిబకినా తొలి సెట్‌ నెగ్గింది. రెండో గేమ్‌లో సబలెంక దూకుడు ప్రదర్శించింది. ఏస్‌లు, విన్నర్లతో విరుచుకుపడింది. ముఖ్యంగా చూడముచ్చటైన బ్యాక్‌హ్యాండ్‌ షాట్లతో అలరించింది. చూస్తుండగానే 4-1తో దూసుకెళ్లింది. అదే ఊపులో వరుసగా రెండు ఏస్‌లతో రెండో సెట్‌ను నెగ్గింది. నిర్ణయాత్మక మూడో సెట్‌ హోరాహోరీగా సాగింది.  స్కోరు 3-3తో సమమైన దశలో బ్రేక్‌ పాయింట్‌ సాధించడం సబలెంకకు కలిసొచ్చింది. తర్వాతి గేమ్‌నూ సొంతం చేసుకున్న ఆమె 5-3తో పైచేయి సాధించింది. ఆ వెంటనే రిబకినా ఓ గేమ్‌ నెగ్గినా.. పదో గేమ్‌లో పట్టువదలకుండా పోరాడిన సబలెంక సెట్‌తో పాటు మ్యాచ్‌నూ కైవసం చేసుకుంది. ఆస్ట్రేలియన్‌ ఓపెన్‌ జూనియర్‌ టైటిళ్లను అలెగ్జాండర్‌ బ్లాక్‌ (బెల్జియం), అలీనా కోర్నీవా (రష్యా) దక్కించుకున్నారు.

తొలి తటస్థ క్రీడాకారిణిగా..

సింగిల్స్‌లో తొలి గ్రాండ్‌స్లామ్‌ టైటిల్‌ గెలిచిన సబలెంక జాతీయ పతాకంతో సంబరాలు చేసుకోలేకపోయింది. అందుకు ప్రత్యేక కారణం ఉంది. ఉక్రెయిన్‌పై యుద్ధం కారణంగా రష్యా, బెలారస్‌ ప్లేయర్లను ఈ గ్రాండ్‌స్లామ్‌లో వాళ్ల దేశాల తరపున ప్రాతినిథ్యం వహించకుండా నిషేధించారు. ఆయా దేశాల జాతీయ పతాకాలను ప్రదర్శించడానికి నిరాకరించారు. కానీ వీళ్లు తటస్థ ప్లేయర్లుగా పోటీపడొచ్చు. ఇప్పుడు బెలారస్‌కు చెందిన సబలెంక.. ఇలాగే బరిలో దిగి విజేతగా నిలిచింది. దీంతో టెన్నిస్‌ చరిత్రలో తటస్థ క్రీడాకారిణిగా ఆడి గ్రాండ్‌స్లామ్‌ టైటిల్‌ గెలిచిన తొలి ప్లేయర్‌గా ఆమె రికార్డు సృష్టించింది. మరోవైపు రష్యాలో పుట్టిన రిబకినా.. కజకిస్థాన్‌కు ప్రాతినిథ్యం వహిస్తోంది. టెన్నిస్‌ కెరీర్‌కు ఆర్థికంగా అండగా నిలిచేందుకు ఆ దేశం ముందుకు రావడంతో ఆమె 2018 నుంచి కజకిస్థాన్‌కు ఆడుతోంది.